چوارشەممان مەلەکردن لە کانییەکی ئاکرێ تەنیا بۆ ژنانە

964+

زەید کۆچەر – دهۆک

رۆژانی چوارشەممە مەلەکردنی پیاوان لە کانییەکی ئاکرێ قەدەغەیە، لە رۆژەدا تەنیا ژنان و کچان بۆیان هەیە مەلە بکەن.

ئەمڕۆ چوارشەممە 26.7.2023، ڤەهێل فەهمی بەرپرسی راگەیاندنی بەڕێوەبەرایەتیی گەشتوگوزاری ئاکرێ بە 964ـی وت، خەڵک گلەییان دەکرد لەوەی پیاو و ژن پێکەوە لە کانی زەردک مەلەیان دەکرد، ئێستا بووەتە بڕیار نابێت رۆژانی چوارشەممە هیچ پیاوێک لە کانییەکەدا مەلە بکات.

“هەموو رۆژێکی چوارشەممە، لە کاتژمێر 8:00ـی بەیانی تا 2:00ـی پاش نیوەڕۆ تایبەت دەبێت بە ژنان و کچان”، ڤەهێل فەهمی وای وت.

رۆژانە گەشتیارێکی زۆر سەردانی هاوینەهەواری کانی زەردک دەکەن و بە وتەی گەشتوگوزاری ئاکرێ، چەندەها ساڵە ئاوی ئەم کانییە بۆ نەخۆشییەکانی پێست بەکاردێت.

“هەر کەسێک نەخۆشی زەردکی هەبێت و مەلەوانی لە ناو ئاوەکەدا بکات و خۆی پێبشوات، یەکسەر چارەسەر دەبێت، گەشتیاری بیانی هەبووە بۆ مەبەستی چارەسەر سەردانی ئەم شوێنەی کردووە”، بەرپرسی راگەیاندنی گەشتوگوزاری ئاکرێ وا دەڵێت.

پێداچوونەوە: هاوبەش ئەبوبەکر