دیمهنێكى رێگا ته‌نگه‌به‌ره‌كه‌ى "کەلــەبەرە"... وێنه: شارهوانى خاڵخاڵان
چاره‌سه‌رى رێگا ته‌نگه‌به‌ره‌كه‌ى خاڵخاڵان ده‌كرێت
964+
فه‌رهاد حه‌سه‌ن
له سنوورى ناحیه‌ى خاڵخاڵان رێگه‌یه‌كی ته‌نگه‌به‌ر هه‌یه، پێیده‌ڵێن “كه‌له‌به‌ره” زۆرجار له وه‌رزى زستاناندا داده‌خرێت، سه‌رۆكى شاره‌وانیش ده‌ڵێت “بڕیاره به‌م زووانه چاره‌سه‌رى یه‌كجارى ئه‌و رێگه‌یه بكرێت و مه‌ترسیه‌كانى نه‌هێڵدرێت”.
ئازاد عاسی عه‌لى، سه‌رۆكى شاره‌وانیى خاڵخالان، به 964ـى راگه‌یاند “رێگای شوان – خاڵخاڵان كه به “کەلــەبەرە” ناسراوه، چاره‌سه‌رى یه‌كجارى بۆ ده‌كرێت”.
ئاماژه‌ى به‌وه‌شدا، ئه‌وان پێشتر له رێگه‌ى ناحیه‌ى شوانه‌وه نووسراویان بۆ چاره‌سه‌ركردنى ئه‌و رێگایه بۆ وه‌زاره‌تى شاره‌وانیى عێراق به‌رزكردووه‌ته‌وه و ئه‌وانیش فه‌رمانیان به به‌ڕێوه‌به‌رایه‌تیی رێگاوبانى كه‌ركوك كردووه، له ماوه‌ى سێ رۆژدا ده‌ستبه‌كار بكه‌ن.
به پێی زانیارییه‌كانى 964 كه له سه‌رۆكى شاره‌وانیى خاڵخاڵان وه‌ریگرتووه، درێژى ئه‌و رێگا ته‌نگه‌به‌ره 400 مه‌تره و به‌رزى ته‌نیشته‌كانیشی نزیكه‌ى 30 مه‌تر ده‌بێت.
رێگاى خاڵخاڵان كه به “كه‌له‌به‌ره” دا تێده‌په‌ڕێت، بۆ هاوڵاتیانى كۆیه و رانیه و قه‌ڵادزێ و ته‌قته‌ق، كه ده‌یانه‌وێت بچنه پارێزگاى كه‌ركوك، وه‌ك رێگایه‌كى سه‌ره‌كى به‌كاری ده‌هێنن و هاوموشۆیه‌كی زۆرى به‌سه‌ره‌وه‌یه، ئه‌مه جگه له‌وه‌ى رێگایه‌كه بۆ ته‌واوى ئه‌و گه‌شتیارانه‌شی ساڵانه سه‌ردانى ناوچه گه‌شتیارییه‌كانى ته‌قته‌ق و خاڵخاڵان ده‌كه‌ن.
ناحیەی خاڵخاڵان دەکەوێتە سنووری شوانى سه‌ر به قه‌زاى چه‌مچه‌ماڵ، لە رووی جوگرافییەوە سەر بە پارێزگای کەرکووکە، بەڵام لە رووى ئیداره‌ییه‌وه سه‌ر به حکومەتی هەرێمی کوردستانە.
