پەیەدە؛ لابردنی زمانی کوردی پێچەوانەی مەرسومەکەی ئەحمەد شەرعە

ئەحمەد مستەفا

لابردنی زمانی کوردی لەسەر تابلۆی فەرمانگەکان پێچەوانەی رێککەوتنەکانە و بابەتەکە پەیوەستە بە هەموو پێکهاتەکانی سوریاوە، پێویستە ئەوانەی دژی پێکەوەژیانی گەلانن وەک تاوانبار بناسێندرێن، ئەمە قسەی پارتی یەکێتی دیموکرات “پەیەدە” یە لەبارەی ئاڵۆزییەکانی حەسەکە.

ئەوە چەند رۆژێکە بۆ جاری دووەم و سێیەم، تابلۆی باڵەخانەی دادوەری لە کۆیە بەبێ هەبوونی زمانی کوردی لەسەری دادەنرێتەوە، خەڵكی خۆجێیش پێی نیگەرانن و دووجار تابلۆکەیان لابردووە.

ئەنجومەنی گشتیی پارتی یەکێتی دیموکرات لە راگەیەندراوێکدا کە 964 بینوویەتی دەڵێ، لابردنی زمانی کوردی لەسەر فەرمانگە فەرمییەکان، پێچەوانەی رێککەوتنەکان و تەنانەت مەرسومی سەرۆک کۆمار ئەحمەد شەرع-ە، لەبارەی بە فەرمی ناساندنی زمانی کوردیی و جەژنی نەورۆزەوە.

ئەوان دەڵێن، پاساوهێنانەوە بۆلابردنی زمانی کوردی، جێگەی نیگەرانییە و پێویستی بە پێداچوونەوەیە، چونکە بابەتەکە تەنیا پەیوەست نییە بە کورد و درێژدەبێتەوە بۆ هەموو سووریا و پێکهاتە جیاوازەکان.

پەیەدە داوای کردووە، کە پێویستە حکومەت و هەموو سورییەکان چەمکی دەوڵەتی نەتەوەی دیموکراتی بە بنەما بگرن، هەنگاوی کۆنکرێتیش بنرێت بۆ بنەبڕکردنی سیاسەتی نکۆڵیکردن، کە رژێمی پێشوو بەرامبەر زۆرینەی سورییەکان و بە تایبەت کورد پەیڕەوی کردووە.