نرخی نەوتی ماڵان روو لە دابەزینە

964+
ئاودێر عومە – سلێمانی

لەگەڵ دابەزینی نرخی نەوت لە بۆرسەکانی جیهانیەکان و گۆڕانکاری لە پلەکانی گەرما، هاوکات نرخی نەوتی سپی ماڵانیش دابەزیوە.

تۆڕی 964 زانیویەتی ئەمڕۆ نرخی بەرمیلێک نەوتی سپی ماڵان جوملەکەی بە 185 و  190 هەزار دینار دەگاتە بەر دەرگای ماڵان، لەکاتێکدا چەند رۆژێک لەمەوبەر بە 225 هەزار دینار بوو.

بڕوا سابیر، کە چەندساڵێکە  خۆی و براکانی سەرقاڵی فرۆشتنی نەوتی ماڵانن لە سلێمانی بە 964ی وت، دابەزینی نرخی نەوت پەیوەندی بە سێ هۆکارەوە هەیە، کە بریتین لە دابەزینی نرخی سوتەمەنیەکان بەگشتی، کەمبوونەوەی خواست لەسەری و خەزنکردنی بڕێکی زۆر لە نەوت لەلایەن جوملەفرۆشەکان.

“لە ناوەڕاستی مانگی شوبات بەرمیلێک نەوت بە 225 هەزار دینار بوو، لە سەرەتای ئەم مانگەشەوە نرخی نەوت دابەزی بۆ 215 هەزار و ئەمڕۆش بە 190 هەزار دینارە و زیاتریش دادەبەزێت”، بڕوا سابیر وای وت.

لە سەرەتاکانی وەرزی پایز نرخی بەرمیلێک نەوت بە 250 هەزار دینار بوو لە وەرزی زستان نرخەکەی سەرکەوت بۆ 300 هەزار دینار، ئەوەش بەهۆی نەبوون و نەدانی نەوت بە هاوڵاتیان لەلایەن حکومەتی هەرێمی کوردستانەوە.