دەتوانن لە پێشانگەی نێودەوڵەتیی تەکنەلۆژیای کانزاکان لە ئەڵمانیا بەشدار بن

964+

ئەرسەلان عەبدوڵا

پێشانگایەكی نێودەوڵەتی بۆ تەکنەلۆژیای کانزاکان، لە شاری ئیسن لە وڵاتی ئەڵمانیا دەكرێتەوە، هەر بازرگان و خاوەنكارێكی هەولێر دەیەوێت بەشداریی بكات، دەتوانێت پەیوەندی بە ژووری بازرگانی و پیشەسازیی هەولێرەوە بكات.

كامەران محەمەد ئەندامی ئەنجومەنی ژووری بازرگانی و پیشەسازیی هەولێر، ئەمڕۆ دووشەممە 18.8.2025 بە 964ی راگەیاند، پێشانگەكە لە ماوەی نێوان 15 تا 19.9.2025 لە شاری ئیسنی ئەڵمانیا دەكرێتەوە، كە تایبەتە بە تەكنەلۆژیای كانزاكان.

وتیشی، بازرگان و خاوەنكاران، ئەوانەی ئەندامانی ژووری بازرگانی و پیشەسازیی هەولێرن، دەرفەتی ئەوەیان هەیە بەشداریی پێشانگەكە بكەن.

“ئەوانەی دەیانەوێت بەشداریی بكەن، بۆ زانیاری زیاتر و شێوازی بەشداریكردنەكە، با سەردانی ژووری بازرگانی و پیشەسازیی هەولێر – بەشی پەیوەندییەکان بکەن”، كامەران محەمەد وای وت.

ئەمساڵ ژووری بازرگانی و پیشەسازیی هەولێر لە دەیان پێشانگەی نێودەوڵەتی و كۆنفرانسی بازرگانی و پیشەسازی، هەلی بۆ بازرگانان و خاوەنكاران رەخساندووە بەشداریی بكەن و هاوبەشیی بازرگانی لەگەڵ بازرگان و كۆمپانیاكانی دەرەوە پەیدا بكەن.

شاندێكی بازرگان و كۆمپانیاكانی ئەمریكا سەردانی هەولێر دەكەن