"بەپێی ماددەی چواری تیرۆر"
ئەنجامدەری تەقینەوەی بۆمبەکەی چەند رۆژی رابردووی داقوق دەستگیرکرا
964+
سیروان خورشید – دوزخورماتوو
هەواڵگری داقوق بەهاوکاری هێزە ئەمنییەکانی سنوورەکە، ئەمشەو پێنجشەممە 19.12.2024، ئەو تۆمەتبارەیان دەستگیرکرد، کە چەند شەوێک پێش ئێستا بۆمبێکی چێندراوی دەنگی لە بەردەم ژمارەیەک دوکانی قەزاکە تەقاندەوە و زیانی ماددی لێکەوتەوە.
عەقید محەمەد مەردان، بەڕێوەبەری پۆلیسی داقوق بە964ـی وت، دوای گەڕان و بەدواداچوونی چڕی هێزە ئەمنییەکان و هەواڵگری قەزای داقوق، ئەمشەو توانرا ئەو تۆمەتبارەی ئەنجامدەری تەقینەوەی بۆمبە دەنگییەکەی گەڕەکی خۆرز بوو، بە ماددەی چواری تیرۆر دەستگیر بکەن.
وتیشی، ئەو تۆمەتبارە پێشینەی تاوانکاری دیکەشی هەبووە و ئێستا لە ژێر لێکوڵینەوەی هێزە ئەمنییەکاندایە و دانی بەتاوانەکەشیدا ناوە.
رۆژی 12ی ئەم مانگە لە گەڕەکی خۆرزی قەزای داقوق، بۆمبێکی دەنگی لە بەردەم ژمارەیەک دوکان تەقێندرایەوە، تەنیا زیانی ماددی بەر دوکانەکان و دوو ئۆتۆمبێل کەوت و هیچ زیانێکی گیانی نەبوو.
پێداچوونەوە: ژێوار خدر
