دوکاندارانی زیانلێکەوتووی بازاڕەکانی لەنگە و شێخەڵا قەرەبوو کرانەوە

964+

شۆڕش قادری

دوکاندارانی زیانلێکەوتووی بازاڕی لەنگە و شێخەڵا لە هەولێر، بە دوو ملیۆن دینار هاوکاری دارایی و لێخۆشبوون لە وەرگرتنی باج  بە رێژەى لە 30% بۆ ساڵى 2023 و لە 100% بۆ ساڵی 2024، قەرەبوو کرانەوە.

ئەمشەو 9.9.2024 لە رێوڕەسمێکدا و بە ئامادەبوونی ئومێد خۆشناو پارێزگاری هەولێر كاسبكاران و دوکاندارانى زیانلێكه‌وتووی بازاڕەكانی لەنگە و شێخەڵا  بە بڕی دوو ملیۆن دینار هاوکاری دارایی و لێخۆشبوون لە وەرگرتنی باج  و بە رێژەى لە 30% بۆ ساڵى 2023 و لە 100% بۆ ساڵی 2024، قەرەبوو کرانەوە، ئەوە جگە لە لێخۆشبوونى کرێى ساڵانە و رسووماتى خۆڵ و خاشاک.

ئەمساڵ دوو جار ئاگر لە بازاڕی لەنگەی هەولێر کەوتەوە و لە هەردوو جارەکەدا 114 دوکان سووتان و جارێکیش ئاگر لە بازاڕی شێخەڵا  کەوتەوە و بەهۆیەوە 17 دوکان سووتان.

بە وتەی پارێزگاری هەولێر، دوو کۆمپانیا کارەکان دەکەن بۆ نۆژەنکردنەوەی بازاڕی لەنگە و 600 ملیۆن دیناری بۆ تەرخانکراوە.

رۆژی یەکشەممەش 8.9.2024 زیانلێکەوتووانی بازاڕی قەیسەری بە بڕی 2 بۆ 20 ملیۆن دینار قەرەبوو کرانەوە، هەروەها بۆ ماوەی یەك ساڵیش لە پارەی ئاو، كارەبا، تابلۆ و خاشاك بەخشران.

دوکاندارانى لەنگەى هەولێر بەچەند شێوەیەک قەرەبوو دەکرێنەوە