سلێمانی

  ئەو كەپرانەی ئاژەڵیان بە نایاسايی تێدا سەردەبڕی تێكدران

+964
كوردستان ئەحمەد

قایمقامیەتی سلێمانی ژمارەیەک کەپر و ئەو جێگایانەی ئاژەڵی تێدا سەردەبڕدرێت، تێکدا.

قایمقامیەتی سلێمانی رایگەیاند، بۆ رێگری لە نەخۆشی تای خوێنبەربوون، بە هاوکاری هێزەکانی بەرگریی شارستانی و هیزەکانی ئاسایش و شارەوانی، هەستان بە لابردن و تێکدانی ئەو شوێنانەی ئاژەڵی تێدا سەردەبڕدرێت.

رێکان جەمال سەرۆکی لیژنە هاوبەشەکانی قایمقامیەتی سلێمانی بە 964ی وت، پێشتر سەرجەم لایەنە پەیوەندیدارەکان کۆبوونەتەوە و رایانگەیاندووە لەگەڵ کڕین و فرۆشتنی ئاژەڵدا کێشەیان، نییە ئەگەر بەپێی رێنمایەکانی تەندروستی و ڤێتێرنەری بێت، بەڵام چەند شوێنێک وەک مەیدانی ئاژەڵانی سلێمانی پاپەندی رێنماییەکان نەبوون و هیچ هەلومەرجێکی تەندروستیشی تێدا بەدی ناکرێت، هەربۆیە دەستبەسەر شوێن و ئاژەڵەکانیشدا دەگرن.

وتیشی، بە توندی سزای ئەو كەسان دەدرێت، كە رێنماییەكان جێبەجێ ناكەن و ئاژەڵ بە شێوەی ناتەندروست سەردەبڕن.

زیاتر لە پەنجا كەپر و شوێنی سەربڕینی ئاژەڵەكان لەسەر رێگا سەرەكییەكان دروستكرابوون، ئەمڕۆ تێكدران و لەناوبران.