لە یەک مانگدا

زیاتر لە 115 حاڵەتی ئاگرکەوتنەوە لە زاخۆ روویانداوە

964+

شڤان عەبدوڵا – زاخۆ

لە سنووری ئیدارەی سەربەخۆی زاخۆ، لە مانگی رابردوودا زیاتر لە 115 حاڵەتی ئاگرکەوتنەوە هەبوو، بەڵام زیانی گیانی نەبووە.

جەمال هەسن، بەڕێوەبەری بەرگریی شارستانی زاخۆ ئەمڕۆ سێشەم بە 964-ی وت، لە کۆی ئەو رووداوانە زیاتر لە 104 حاڵەتیان بەهۆی ئاگرکردنەوە بووە لەلایەن خەڵک لە گۆڕەپانە چۆڵەکانی نزیک گەڕەکەکان، ئەمەش بەهۆی سووتاندنی پووش یان پاککردنەوەی لە خاشاک، بەڵام لە کۆنتڕۆڵی خەڵک دەرچووە و تەشەنەی کردووە.

بەڕێوەبەری بەرگریی شارستانیی زاخۆ ئەوەشی وت، سێ حاڵەتی سووتانی دەغڵودان هەبووە لە سنوورەکە، بەشێکیان پەیوەندیان هەبووە بەو شووشانەی لە نێو کێڵگەی گەنم فڕێدراون، تیشکی خۆر لێیان دەدات و دەبێتە هۆکاری ئاگر کەوتنەوە.

بە گوێرەی زانیاریی کەسانی شارەزای ئاگرکوژێنەوە، ساڵانە بەشێکی ئەو رووداوی ئاگرکەوتنەوانەی روودەدەن بەهۆی فڕێدانی پاشماوەی جگەرەی نەکوژاوە و شووشە دروست دەبێت، بە جۆرێک کاتێک تیشکی خۆر لە شووشەکە دەدات، گەرمیی تیشکی خۆر دەگوازرێتەوە و رووداوی ئاگرکەوتنەوەکە دروست دەبێت.

بەرگریی شارستانیی ئیدارەی سەربەخۆی زاخۆ رایگەیاندوە هاوڵاتیان لە هەبوونی هەر رووداوێکی ئاگرکەوتنەوە دەتوانن پەیوەندی بە هێڵی گەرمی 115 بکەن.

پێداچوونەوە: فەهمی نەبی