ئەو مامۆستا ئایینیەی هێرشی کردبووە سەر کوردانی ئێزدی روونکردنەوەیەکی بڵاوکردەوە

فەرهاد حەسەن

رامین ساڵحزادە، ئەو مامۆستای ئایینییەی دوو رۆژ لەمەوبەر لە وتەیەکی ڤیدیۆییدا هێرشی کردبووە سەر کوردانی ئێزدی روونکردنەوەیەکی بڵاوکردووەتەوە و دەڵێت “ڤیدیۆکەم دەستکاری کراوە و مەبەستم هەموو ئێزدییەکان نەبووە”.

ئەو مامۆستا ئایینییە، لە شاری بانەی رۆژهەڵاتی کوردستان دەژیت و وەکو لە ئینستاگرامەکەی دەردەکەوێت، پێشنوێژ و وتاربێژی مزگەوتی گوندێکی شاری بانەیە و لە وتاری چەند رۆژێک لەمەوبەریدا سووکایەتی بە کوردانی ئێزدی کرد و هەڕەشەی کوشتن و سڕینەوەی لێکردن.

ساڵحزادە لە روونکردنەوەکەیدا دەڵێت، ئەو قسانەی لەسەر ئینستاگرامەکەم دانرابوون، دەستکاریکراو بوون و ئەدمینی پەیجەکە بەشێک لە قسەکانی بڕیبوو”.

دەشڵێت، “من باسی ئەو ئێزدییانەم کردووە کە بێ رێزی بە خودا، ئیسلام و پێغەمبەری موسڵمانان دەکەن، نەک هەموویان.”

ئاماژەی بەوەشکردووە، سەر بە هیچ لایەنێکی تووندڕۆ نییە و لایەنگری هیچ حیزبێک نییە، “جگە لە شەریعەتی ئیسلام، هیچ شتێکی دیکەم قبووڵ نییە.”

دوای بڵاوبوونەوەی سەکانی یەکەمجاری ئەو مامۆستا ئایینییە، بەشێوەیەکی فراوان لەلایەن چین و توێژە جیاوازەکانەوە وەڵامدرایەوە و وەزارەتی ئەوقافی هەرێمیش لە راگەیەندراوێکدا ئاماژەی بەوەکرد کە “بەکارھێنانی وشەی نالۆژیکی بەرانبەر ھەر پێکھاتەیەک بەتوندی رەتدەکەینەوە و جەخت لە برایەتی خۆشەویستی و پێکەوەژیانی ھەمەلایەنە دەکەینەوە”.