نەخۆشەکانی نەخۆشخانەی ئازادیی کەرکوک سەلامەتن

کاروان ساڵحی

ئاگرەکەی ئەمشەوی نەخۆشخانەی ئازادی لە کەرکوک باش بوو بێ زیان بوو، هاوڵاتیانیش دەڵێن، نەخۆشەکانیان بۆ سەلامەتی کردە دەرەوە و بەشێکیشیان هەر رۆیشتنەوە ماڵەوە.

ئەمشەو هەینی 8.5.2026 ئاگرێک لە بەشی راوێژکاریی منداڵانی نەخۆشخانەی ئازادی لە کەرکوک کەوتەوە، تیمەکانی بەرگریی شارستانی زوو گەیشتن و کۆنتڕۆڵیان کرد.

964 قسەی لەگەڵ ژمارەیەک هاوڵاتی کرد، کە لە ژوورەوە بوون، یەکێک لەوان لە ناو تەکسییەوە قسەی کرد و دیار بوو بە نیازی ماڵەوە بوو، “سەرجەم نەخۆشەکان باش بوون و زۆربەشیان دەرکرانەدەرەوە و لە نزیک شۆستەی نەخۆشخانە بوون”.

گەنجێکیش بۆ 964 قسەی کرد و دەڵێت، “لە قاتی پێنجەم بووم و دکتۆرەکان وتیان رابکەن بڕۆنە دەرەوە، ئاگر لە ئیستشارییەکە کەوتووەتەوە”.

هەروەها یەکێکی دیکەش وتی، سوپاس بۆ خوا هەمووان سەلامەتن.

هێشتا بەرگریی شارستانیی کەرکوک هۆکاری کەوتنەوەی ئاگرەکەی رانەگەیاندووە و پێدەچێت خەریکی لێکۆڵینەوە بن.

نوێکرایەوە  11:44

دکتۆر ئەرجان محەمەد بەڕێوەبەری فەرمانگەی تەندروستیی کەرکوک بۆ 964 وتی، ئاگرەکە لە دوو ژووری بەشی ئیستیشاری کەوتووەتەوە ، تیمەکانی ئاگرکوژێنەوە جامەکانیان شکاندووە، بۆ ئەوەی دوکەڵەکە دەربچێت.

وتیشی، هیچ زیانێکی گیانی نەبووە، تیمەکانی خۆیان و تیمی بەرگریی شارستانی کۆنتڕۆڵیان کردووە.

“سەرەتا بۆ ئەوەی زیانی گیانی نەبێت داوای چۆڵکردنی نەخۆشخانەمان کردبوو، یاخود بێنە خوارەوەی نەخۆشخانەکە، بەڵام ئێستا کۆنتڕۆڵ کراوە و تیمەکان سەرقاڵی پاککردنەوەی شوێنی ئاگرەکەن و نەخۆشەکان دەگەڕێنەوە ناو قاوشەکان، دکتۆر ئەرجان محەمەد وای وت.

پێداچوونەوە: ئەرسەلان عەبدوڵا