کڵاودفڵەیر تووشی کێشە بوو

ژێوار خدر

کۆمپانیای کلاودفڵەیر (Cloudflare)، کە یەکێکە لە دابینکەرە سەرەکییەکانی خزمەتگوزارییەکانی ژێرخانی ئینتەرنێت، تووشی کێشەیەکی گەورەی ناوخۆیی بووەتەوە لە خزمەتگوزارییەکانی، ئەمەش کاریگەری هەبوو لەسەر سەدان ماڵپەڕ و خزمەتگوزاریی ئۆنلاین لە سەرانسەری جیهاندا، بە شێوەیەک کە هەندێک لە خزمەتگوزارییەکان بۆ ماوەیەک لەکارکەوتن یان بە پچڕپچڕی کاریان دەکرد.

کلاودفڵەیر بە فەرمی کێشەکەی پشتڕاستکردووەتەوە و دەڵێت: “تووشی کێشەی ناوخۆیی خزمەتگوزاری بووینەتەوە، هەندێک لە خزمەتگوزارییەکان لەوانەیە بە شێوەیەکی پچڕپچڕ کاریان تێبکرێت، ئێمە سەرنجمان لەسەر گەڕاندنەوەی خزمەتگوزارییەکانە، هەوڵدەدەین ئەپدەیتی سیستمەکەمان بکەین و زانیاری نوێتر بەم زووانە بڵاودەکرێتەوە.”

پلاتفۆرمی X (تویتەری جاران) یەکێک بوو لەو خزمەتگوزارییانەی کە بەهۆی ئەم کێشەیەوە کاری تێکرا و بۆ ماوەیەک لەکارکەوت، بەکارهێنەران لە سەرتاسەری جیهاندا تووشی کێشە بوون لە چوونەژوورەوە بۆ هەژمارەکانیان و کارلێککردن لەگەڵ ناوەڕۆکی پلاتفۆرمەکە.

بەگوێرەی راپۆرتەکان، ئەم وەستانە لە X راستەوخۆ پەیوەندی بە پەککەوتنی کلاودفڵەیرەوە هەبووە، چونکە کلاودفڵەیر رۆڵێکی سەرەکی دەگێڕێت لە دابینکردنی ژێرخانی تەکنیکی بۆ چەندین وێبسایتی گەورە و پاراستنیان لە هێرشە ئەلیکترۆنییەکان.

جگە لە X، چەندین خزمەتگوزاریی دیکەی دیار و جیهانی وەک چاتجی پی تی (ChatGPT)، سپۆتیفای (Spotify) و کانڤا (Canva) و چەندین یاریی ئۆنلاینیش رووبەڕووی پەککەوتن بوونەوە. کۆمپانیای کلاودفڵەیر رایگەیاندووە کە تیمەکانیان بە چڕی کار دەکەن بۆ چارەسەرکردنی کێشەکە و گەڕاندنەوەی تەواوی خزمەتگوزارییەکان، و پێشبینی دەکرێت بۆ ماوەیەکیش بەکارهێنەران کێشەی زیاتر ببینن.