بەشێک لە شاخی سەر رێگای بێخاڵ داڕما

شۆڕش قادری

بەهۆی بارانبارین و بەستەڵەک، بەشێک لە شاخی سەر رێگای سەیرانگای بێخاڵ داڕما، بەڵام زیانی گیانی و ماددی نەبوو، تیمەکانی رێگاوبانی سۆرانیش دەستبەجێ رێگاکەیان پاککردەوە.

خوسرەت سادق بەڕێوەبەری رێگاوبانی ئیدارەی سۆران بە 964ـی وت، “بەیانی ئەمڕۆ هەینی 13.12.2024 بەشێک لە شاخی سەر رێگای نێوان خەلیفان – بێخاڵ داڕما و دوای رووداوەکەش دەستبەجێ تیمەکانمان گەیشتنە شوێنی رووداوەکە و رێگاکەیان پاککردەوە”.

“بەهۆی داڕمانی شاخەکە، رێگاکە بەتەواوی نەگیرابوو، ئۆتۆمبێلی بچووک هاتوچۆی دەکرد، بەڵام ئەگەر پاسی گەشتیاران و تانکەر بهاتایە، کێشەیان بۆ دروست دەبوو”، خوسرەت سادق وای وت.

ئاماژەی بەوەش کرد، رووداوەکە هیچ زیانی گیانی و ماددی نەبووە و داڕمانی شاخەکە رەنگە بەهۆی ئەو بارانبارین و بەستەڵەکەوە بێت، کە دوو رۆژە رووی لە ناوچەکە کردووە.

سەیرانگای بێخاڵ دەکەوێتە قەزای رواندزی سەر بە ئیدارەی سۆران و بەهۆی هەڵکەوتەی جوگرافی و دیمەنە جوانەکانی، یەکێکە لە ناوچە سەرنجڕاکێشەکانی هەرێمی کوردستان و لە هەموو وەرزێکدا گەشتیاران رووی تێدەکەن، ناوەناوەش بەردی سەر شاخەکانی رێگای بێخاڵ، بەردەبنەوە و ئاستەنگی هاتوچۆ دروست دەکەن.

+2