لە قەڵادزێ کەسێک لەسەر دزینی سەرەمەنهۆڵ دەستگیر کرا

ژووری هەواڵ

پۆلیسی راپەڕین دەستگیرکردنی کەسێکی لەسەر دزیکردن راگەیاند و دەڵێت، تۆمەتبارە بە دزینی سەرەمەنهۆڵ لە قەڵادزێ.

ئەمڕۆ شەممە 9.11.2024، بەڕێوەبەرایەتی پۆلیسی راپەڕین رایگەیاند، هێزەکانمان لە بنکەی پۆلیسی شارەوانی دوای بەدواداچوون و لێکۆڵینەوە لەسەر دیاردەی دزینی سەرەمەنهۆڵەکان تۆمەتبارێکیان لە کاتی دزینی سەرەمەنهۆڵەکان دەستگیرکرد، دوای لێکۆڵینەوە لەگەڵیدا لەبەردەم پۆلیسدا دانیناوە بە تاوانەکەیدا.

ئاماژەی بەوەشکرد، لە کاتی دەستگیرکردنیدا، سێ سەرە مەنهۆڵی پێوە گیراوە و دەستیش گیراوە بەسەر ماتۆڕسکیلەکەیدا.

بە بڕیاری دادوەری لێکۆڵینەوە بەپێی مادەی 444 لە یاسایی سزادانی عێراقی راگیراوە، دوای گرتنەبەری رێوشوێنی یاسایی دۆسییەکە نێردراوە بۆ نوسینگەی نەهێشتنی تاوانی پشدەر.