بەڕێوەبەرایەتی گشتی کارەبای سلێمانی - وێنە: 964
لەسەر چی راگیراوە؟
وردەکاری دەستگیرکردنی بەڕێوەبەری پێشووی کارەبای سلێمانی
964+
ژوری هەوال
دوێنێ یەکشەممە، بەڕێوەبەری پێشووی کارەبای سلێمانی راگیراوە لەسەر بابەتێکی تایبەت بە بەڕێوەبەرایەتی گشتی کارەبای سلێمانی و تا ئەم ساتە ئازاد نەکراوە.
سەرچاوەیەکی ئاگادار لە کارەبای سلێمانی بە 964ـی وت، لەو کاتەی سالار حسامەدین بەڕێوەبەری گشتی کارەبای سلێمانی بووە، هاوکاری کارمەندێکی بەرێوەبەرایەتیەکەی کردووە و ئێستا لەسەر ئەو بابەتە راگیراوە.
ئەو سەرچاوەیە باسی لەوەکرد، ژمارەیەک خانوو موڵکی بەڕێوەبەرایەتی کارەبای سلێمانی و کارمەندانی بەڕێوەبەرایەتیەکە تیایدا دەمێننەوە، یەکێک لە کارمەندە نیشتەجێکان خانەنشین بووە و لە هەمانکاتدا تووشی نەخۆشی شێرپەنجە بووە.
ئەوەی خستەڕوو، کارمەندەکە داوایەکی لە بەڕێوەبەری پێشوی کارەبا کردووە هاوکاری بکات تا ئەو نەخۆشیە تێدەپەرێنێت بمێنێتەوە لە خانووەکەدا، بەو هۆیە هاوکاری کراوە و کارمەندە خانەنشینەکە ماوەتەوە لە خانوەکەی بەڕێوەبەرایەتی کارەبادا.
ئەو سەرچاوەیە وتی:”لەسەر ئەو بابەتە سالار حسامەدین بانگ کراوە و تا ئەم ساتە راگیراوە، هەوڵەکان لە کارەبای سلێمانیەوە بەردەوامن بۆ ئازادکردنی”.
لەسەر ئەم بابەتە پەیوەندیمان کرد بە کارەبای سلێمانیەوە و باسیان لەوەکرد، ئاگاداری ئەو بابەتە نین، هاوکات پەیوەندیمان کرد بە پۆلیسی سلێمانیەوە وەڵامی پەیوەندیان نەدایەوە.
پێداچوونەوە: توانا نەقی
