دابەستەن
گۆشتفرۆشێكی سلێمانی نرخی گۆشتی خۆماڵى کرد بە 10 هەزار دینار
964+
ئەحمەد محەمەد – سلێمانی
ماوەی هەفتەیەك دەبێت، یەكێك لە گۆشتفرۆشەكان كە دوکانەکەى دەكەوێتە گەڕەكی چوارباخی سلێمانی، نرخی گۆشتی دابەزاندووە و خاوەنەكەی دەڵێت، “لە بەرژەوەندی خەڵكی سلێمانی، گۆشتی سوورمان هەرزان کردووە.”
محەمەد عەلادین، خاوەنی دوكانەكەیە خەڵكی موسڵە، بەڵام بە كوردییەكی رەوان قسەی بۆ 964 كردووە و وتی، “بڕیارمان داوە نەهێڵین خەڵكی هەژار موحتاج بێت، ئێمە لەبەرژەوەندی خەڵكی سلێمانی گۆشتمان هەرزانكردووە و هەر كیلۆیەك بە 10هەزار دینار دەفرۆشین”.
لەبارەی گۆشتەكەیانەوە وتی، گۆشتەكەمان خۆماڵییە و ئاژەڵەكانمان دابەستەی خۆمانن، لە قەسابخانەی سلێمانی لەژێر چاودێری تەندروستی سلێمانی سەر دەبڕدرێن.
ئەو گۆشتفرۆشە باسی لەوەشكرد، لەدوای هەرزانكردنی نرخی گۆشت خەڵكێكی زۆر روویان تێدەکات و زۆریش رازین لەگۆشتەكە، لەكاتژمێر دووی دوا نیوەڕۆوە گۆشتیان نامێنێت، رۆژانەش چوار سەر ئاژەڵی گەورە لە دوكانەكەیاندا دەفرۆشرێت.
دابەستە بەو ئاژەڵە دەوترێت کە بەمەبەستى سەربڕین بەخێو دەکرێت و ئالیک و خواردنى زۆرى پێدەدرێت بۆ ئەوەى قەڵەو ببێت و ئامادەبێت بۆ سەربڕین.
پێداچوونەوە: ژێوار خدر
