چوار ئەسپ لەلایەن شارەوانى حاجیاوا دەستیان بەسەرداگیراوە...وێنە: شارەوانى حاجیاوا
کەس خۆی ناکات بە خاوەنیان
شارەوانى حاجیاوا چوار ئەسپى دەستبەسەر کردووە
964+
وریا فەتاح
دوو رۆژە چوار ئەسپ لەلایەن شارەوانى حاجیاوا دەستى بەسەرداگیراوە و وەک سەرۆکى شارەوانیش دەڵێت، کەس خۆى ناکات بە خاوەنیان.
سوارە فەتاح، سەرۆکى شارەوانى حاجیاوا بە 964ـى وت،”دوو رۆژە چوار ئەسپ لەلایەن تیمەکانمانەوە دەستیان بەسەرداگیراوە کە ببونە هۆى بێزارکردنى خەڵک و تێکدانى سیماى شار”.
دەشڵێت: دوو رۆژە کەس نەهاتووە بۆ وەرگرتنەوەیان و هیچ کەس خۆى ناکات بە خاوەنیان.
“شارەوانى حاجیاوا نیازى هەیە ئەگەر خاوەن بۆ ئەسپەکان پەیدا نەبوو، بیانگوازنەوە بۆ چیاى ئاسۆس و لەوێ بەرەڵایان بکەن”، سوارە فەتاح واى وت.
سوارە فەتاح کە پێشتر سەرۆکى شارەوانى چوارقوڕنەبوو، باس لە ئەزموونى رووبەڕووبونەوەى ئاژەڵى بەرەڵا دەکات و دەڵێت، لە چوار قوڕنە هەر مانگایەک دەستى بەسەرداگیرابا بە 25 هەزار دینار خاوەنەکەى پێبژاردنى بۆ دەکرا، ئەگەر دووبارە ببوایەتەوە پێبژاردنەکە دەبوو بە 50 هەزار و لە جارى سێیەم 100 هەزار دینار.
وەک خۆى باسى دەکات، بەم رێکارە توانیان ئاژەڵى بەرەڵا لەسەر شەقام و ناو بازاڕى چوارقوڕنە کۆتایى پێبهێنن، هەر بۆیە نیازى هەیە لە حاجیاواش لەمەودوا هەمان کار پەیڕەو بکات.
