کونسوڵخانەی چین لە بارەی شامپۆ “قەدەغەکراوەکە” هاتە دەنگ

ژووری هەواڵ

کونسوڵخانەی چین روونکردنەوەیەکی لەبارەی ئەو شامپۆیە بڵاوکردەوە کە دەموچاوی چەند کەسێکی شێواند و دواتر لە سلێمانی قەدەغە کرا.

لە روونکردنەوەکەدا کونسوڵخانەی چین دەڵێت، هاوسۆزی خۆیان بۆ بەکارهێنه‌رانی به‌رهه‌می شامپۆی “Brimles Herbal-Bubble” رادەگەیەنن و “ئامادەین هه‌ماهه‌نگی لەگەڵ لایه‌نه‌ پەیوەندیدارەکانی حکومەتی هەرێمی کوردستان بکەین بەمەبەستی زانینی سەرچاوە و کەناڵی هاوردەکردنی ئەو بەرهەمە و زانیاری سەبارەت بە ئەنجامی پشکنینی کوالیتی”.

کونسوڵخانەی چین دەشڵێت، هەر بەرهەمێکی ساختە و خراپ، کاتێک پشتڕاستکرایەوە، پێویستە بە خێرایی لە بازاڕ دەربکرێت و لە رێگای هەوڵە هاوبەشەکانمانەوە دەتوانین بەرژەوەندی و مافی بەكارهێنه‌ران لە پلەی یەکەمدا بپارێزین.

لە رێکەوتی 28.3.2024، دوای بەدواداچوونەکانیان لیژنەکانی قایمقامیەتی سلێمانی ىڕیکی زۆر لە شامپۆی “Brimles Herbal-Bubble” کە دەستیان بەسەردا گرتبوو لەناویان برد.

سۆکار مەحمود نوێنەری کوالیتی کۆنترۆڵ بۆ 964 وتی، دوای ئەوەی ئەو شامپۆیە دەموچاوی چەند کەسێکی تووشی هەستیاری کرد، لیژنەکانیان سەردانی بازاڕەکانی سلێمانییان کردووە و چەندین نمونەیان قورگرتووە لەو شامپۆیە.

وتیشی، دوای پشکنینەکانیان بۆیان دەرکەوتووە ئەو جۆرە شامپۆیە بەهۆی پێکهاتە خراپەکانی ناویەوە شیاو نییە بۆ بەکار هێنان و پێست تووشی هەستیاری و هەوکردن و سووربوونەوە دەکات.

“ئێمە پێمان خۆشە هەماهەنگی لەگەڵ لایه‌نه‌ پەیوەندیدارەکانی حکومەتی هەرێمی كوردستان بکەین و وردەکاری تەواوی ئەم رووداوە وەربگرین بە مەبەستی رووبەڕووبوونەوەی هەر کێشەیەک کە لەوانەیە لە پرۆسەی هاوردەکردنی کاڵاکەدا هەبێت”، کونسوڵخانەی چین وا دەڵێت.