سوودانی لیژنەیەک لەسەر چەند کێشەیەکی هەرێم پێکدەهێنێت

پێشەوا محەمەد

محەمەد شیاع سوودانی، سەرۆکوەزیرانی عێراق لیژنەیەکی بۆ جێبەجێکردنی چەند داواکارییەکی هەرێمی کوردستان پێکهێناوە، ئەندامێکی ئەنجومەنی نوێنەرانی عێراق روونکردنەوەی لەبارەوە دەدات.

لیژنەکە دوێنێ یەکشەممە 24.3.2024 پێکهێندراوە و بڕیارە لە هەفتەی داهاتووەوە دەست بە کارەکانی بکات.

نەرمین مەعروف، جێگری سەرۆکی لیژنەی دارایی ئەنجومەنی نوێنەرانی عێراق، بە 964ـی راگەیاند، لیژنەکە کار لە چەند بابەتێکدا دەکات بۆ جێبەجێکردنی داواکاری و چارەسەرکردنی ئەو کێشانەی خراونەتە بەردەست سەرۆکوەزیرانی عێراق.

وتیشی، “پرسی هاوتاکردنی موچە و ئیمتیازاتی زیندانی سیاسی بە هاوتاکانیان لە عێراق و جێبەجێکردنی بڕیاری دادگای فیدڕاڵی بۆ دابەشکردنی موچە دوو داواکاری بوون کە پێشکەشی محەمەد شیاع سوودانیم کردووە”.

ئەو پەرلەمانتارە ئاشکراشی کرد، پرسی قەرەبووکردنەوەی زیانلێکەوتووانی بۆردوومانی ناوچە سنوورییەکانی هەرێم و هەمواری یاسای کۆچ و کۆچبەران بە مەبەستی قەرەبووکردنەوەی ئەو هاوڵاتیانەی هەرێم، کە لەسەردەمی رژێمی پێشوو تووشی راگواستن بوونەوە دوو بابەتی دیکە بوون.

“لیژنەکە بە شێوەی قۆناغبەندی کار لەسەر تەواوی ئەو تەوەرانە دەکات و میکانیزمی چارەسەرییەکانیان دەخاتەڕوو”، ئەوەش قسەی نەرمین مەعروفە.