پۆستەری قایمقامیەتی سلێمانی بە یەکێک لە دوکانە داخراوەکانەوە - وێنە: قایمقامیەتی سلێمانی
گرانفرۆشییان کردووە
لە سلێمانی دوو دوکانی غازفرۆشتن داخران
964+
پێشەوا محەمەد
لیژنە هاوبەشەکانی قایمقامیەتی سلێمانی دوو دوکانی غازفرۆشتنیان لە نزیک فولکەی مامەڕیشە داخست و هۆکارەکەشی بۆ گرانفرۆشی دەگەڕێننەوە.
قایمقامیەتی سلێمانی لە زاری گۆران قادر، سەرۆکی لیژنە هاوبەشەکانەوە بڵاویکردووەتەوە، ئەو دوکانانە بەهۆی وەرگرتنی پارەی زیاتر لە کڕیار و پابەند نەبوون بە رێنماییەکان و ئەو نرخەی بۆیان دیاریکراوە داخراون و “رێکاری یاسایی بەرامبەر خاوەنەکانیان دەگیرێتەبەر”.
وتیشی، “نرخی بوتڵێک غازی پڕی 28 کیلۆگرامی بە هەشت هەزار و 500 دینارە و رێگەنادەین هیچ کەس و دوکاندارێک بەو نرخە زیاتر بیفرۆشێت”.
سەرۆکی لیژنە هاوبەشەکان باسی لەوەش کردووە، ئەو غازەی لە بەنزینخانەکاندا دەفرۆشرێ غازی بازرگانییە و لە لایەن حکومەتەوە پاڵپشتی نەکراوە و بەدەرە لەو نرخە پاڵپشتیکراوە.
هەفتەی رابردووش قایمقامیەتی سلێمانی لە هەمان شەقام و بە هەمان هۆکار غازفرۆشێکیان داخست و ئاگادارکردنەوەیان بۆ یەکێکی دیکەیان کرد.
