زیاتر لە مانگێکە داهاتی سلێمانی و هەڵەبجە هەفتانە لە حەوت ملیار دینار تێناپەڕێ

شۆڕش قادری

زیاتر لە مانگێکە داهاتی نانەوتی پارێزگاکانی سلێمانی و هەڵەبجە بەهەردوو ئیدارەی گەرمیان و راپەڕینەوە هەفتانە لە حەوت ملیار دینار تێناپەڕی و ئەم هەفتەیەش نەگەیشتە هەشت ملیار.

بەپێی نوێترین داتا و ئاماری ماڵپەڕی شەفافیەت، داهاتی نانەوتیی هەردوو پارێزگای سلێمانی و هەڵەبجە و هەردوو ئیدارەی راپەڕین و گەرمیان لە رۆژی 5.9.2026ـەوە تا ئەمڕۆ هەینی 11.9.2026، تەنیا حەوت ملیار و 162 ملیۆن و 753 هەزار و 977 دینارە، لەکاتێکدا هەفتەی پێشوو پێنج ملیار و 845 ملیۆن و 428 هەزار و 395 دینار بوو و هەموو مانگی رابردووش هەفتانە ئەو داهاتە نەگەیشتووەتە هەشت ملیار دینار.

لە داهاتی ئەم هەفتەیەی پارێزگاکانی سلێمانی و هەڵەبجە، بڕی 5 ملیار و 602 ملیۆن و 775 هەزار و 882 دیناری بە شێوەی نەختینە، ملیارێک و 555 ملیۆن و 778 هەزار و 95 دیناریشی چەک و چوار ملیۆن و 200 هەزاری دیناریشی مقاسە.

ماڵپەڕی شەفافییەت هەموو هەفتەیەک داهاتە نانەوتییەکانی هەریەکە لە پارێزگاکانی سلێمانی، هەڵەبجە و ئیدارە سەربەخۆکانی گەرمیان و راپەڕین دەخاتەڕوو.

ئەو داهاتەی ماڵپەڕەکە ئاشکرای دەکات، لە دەروازە سنوورییەکان، فڕۆکەخانە، گومرگ، کرێی کێش و پێوەرەکان، پێبژاردن و سزای دارایی، پشکنینەکان، رسووماتی بەخشین، ژینگەی ئۆتۆمبێل، تابلۆ و داهاتی شارەوانییەکان، بەدەستهاتووە.