دیمەنى یەکێک لە رووبەڕووبونەوەکانى نێوان قەتەڕو ئوردن
ئوردن یان قەتەڕ
کێ دەبێتە پاڵەوانى جامى ئاسیا؟
964+
وریا فەتاح
ئێوارەى ئەمڕۆ، ناونیشانى پاڵەوانى جامى ئاسیا دیارى دەکرێت، ئەوەش دواى ئەوەى یاریى کۆتایى لە نێوان ئوردنى ئەسپى رەشى پاڵەوانیەتییەکە و قەتەڕى خانەخوێ، ئەنجام دەدرێت.
لە ژێر پلەى گەرماى 19 پلەى سیلیزى و لە کاتژمێر 6:00ى ئێوارە، یاریگەى لۆسێل ژووانى خۆى لەگەڵ عاشقانى تۆپى پێى ئاسیا ئەنجام دەدات و باوەشى بۆ یارىی کۆتایى جامى ئاسیاى 2023، لە نێوان قەتەڕ و ئوردن دەکاتەوە.
هەڵبژاردەى قەتەڕ کە پاڵەوانى جامى ئاسیاى رابردووە، دەیەوێت پارێزگارى لە دەستکەوتەى بکات و بۆ جارى دووەم لەسەریەک، جامەکە بگرێتە باوەش.
هەرچى هەڵبژاردەى ئوردنە، کە بە هەڵبژاردەى قۆناغى کۆمەڵەکان ناسراوە، بەڵام لە پاڵەوانیەتیى ئەمجارەدا ئەسپى رەشە و توانیویەتى بەسەر پشتى عێراق و کۆریادا بگاتە یاریى کۆتایى.
هەردوو هەڵبژاردە چاویان لەسەر جامەکەیە، قەتەڕ دەیەوێت جامەکە لە دەوحە نەچێتە دەرەوە و ئوردونییەکانیش دەیانەوێت خەونە مەحاڵەکەیان بکەن بە راستى، بۆیە یەکێک لەو دوو هەڵبژاردەیە، ئەمڕۆ دەبێتە پاڵەوان و پێنج ملیۆن دۆلار و دونیایەک رێزلێنان و دڵخۆشى وەردەگرێت.
هەردوو هەڵبژاردە تائێستا 21 یاریی لە نێوانیان ئەنجامدراوە، قەتەر بە بردنەوەى 11 یارى پێشەنگە و ئوردن تەنیا 6 سەرکەوتنى تۆمارکردووە.
