دەستبەسەراگرتنى ئامێرێکى بیرهەڵکەندنى نایاسایى لە هەڵەبجە وێنە: پەڕەى بەڕێوەبەرایەتى پۆلیسى دارستان و ژینگەى هەڵەبجە
کەس خۆى ناکات بە خاوەنى
ئامێرێکى بیرهەڵکەندن دەستى بەسەردا گیرا
وریا فەتاح
لە سنوورى پارێزگاى هەڵەبجە، ئامێرێکى بیرهەڵکەندن دەستیبەسەردا گیرا و وتەبێژى پۆلیسى دارستانیش دەڵێت، هاوڵاتیان هاوکارن و ئاگاداریان دەکەنەوە.
فەرمان عومەر، وتەبێژى پۆلیسى دارستان و ژینگەى هەڵەبجە بە 964ى وت،”شەوى رابردوو، بنکەی پۆلیسی دارستان و ژینگەی سیروان، لە نێوان هەردوو گوندى شەکرانى و تەپى سەفا، دەستیان بەسەر ئامێرێکى بیرهەڵکەندندا گرت”.
هیچ کەس لەسەر رووداوەکە دەستگیر نەکراوە، بەڵام بە وتەى فەرمان عومەر، فەرمانى دەستگیرکردن بۆ خاوەنى زەوییەکە دەرچووە.
بە وتەى وتەبێژى پۆلیسى دارستان و ژینگەى هەڵەبجە، هاوڵاتیان هاوکارن و لە حاڵەتى هەڵکەندنى بیرى نایاسایى ئاگاداریان دەکەنەوە.
تەنیا لە ماوەى هەفتەیەکدا، ئەوە دووەمین حاڵەتى دەستبەسەرداگرتنى ئامێرى هەڵکەندنى بیرى نایاساییە لە سنوورى هەڵەبجەدا.