کەمپێکی ئاوارەکان لە پارێزگای دهۆک وێنە:964+
بەغدا دەیەوێت تا 10ـی مانگی داهاتوو هەموو کەمپی ئاوارەکانی دهۆک دابخات
964+
هاوبەش ئەبوبەکر
بڕیارە تا رۆژی 10ی ئەیلولی ئەمساڵ سەرجەم کەمپی ئاوارەکان لە دهۆک دابخرێن، بەڕێوەبەرایەتی کۆچی پارێزگای دھۆکیش دەڵێت، بە زۆر ئاوارەکان نانێرنەوە.
ئەمڕۆ سێشەممە 15.8.2023، پیردەیان جەعفەر بەڕێوەبەری کۆچ و کۆچبەرانی عێراق لە دھۆک بە 964ـی راگەیاند، نزیکەی 300 ھەزار ئاوارە کە 95%یان خەڵکی شنگالن لە کەمپەکانی پارێزگای دھۆکن.
وتیشی، بە بڕیاری وەزارەتی کۆچ و کۆچبەرانی عێراق دەبێت سەرجەم کەمپەکان تا 10.9.2023 دابخرێن، بەڵام وەک سیاسەتی ھەرێم ئەوان بە زۆر ئاوارەکان نانێرنەوە.
بە وتەی پیردەیان جەعفەر، ئاوارەکان کێشەی ئەمنی و شوێنی نیشتەجێبوونیان ھەیە و حکومەتی عێراقیش کەمتەرخەمە بەرامبەریان.
دواین داتای ناوەندی قەیرانەکانی ھەرێمی کوردستان ئاشکرایکردووە، لە ھەرێمی کوردستان 30% ئاوارەکان لە 36 کەمپ دەژین، لە بەرانبەردا %70یان لە دەرەوەی کەمپ و لەناو دانیشتووانی ھەرێمی کوردستان دەژین بەجۆرێک لە ھەولێر: 41%، سلێمانی: 19% و دھۆک: 40%.