هۆکاری جیاوازی نرخی بەنزین لە نێوان هەولێر سلێمانی چییە؟

964+

فەهمی نەبی

بە گوێرەی بەدواداچوونێکی 964 جیاوازی بەرچاو لە نرخی هەر سێ جۆری بەنزین لە نێوان هەولێر و سلێمانیدا هەیە، سەرۆکی ئەنجومەنی بەنزیخانە ئەهلییەکان هۆکارەکەی ئاشکرا دەکات.

جەنگی مەجید، سەرۆکی ئەنجومەنی بەنزیخانە ئەهلییەکانی هەولێر، بۆ 964 دەڵێت، هۆکاری جیاوازی ئەو نرخانە ئەوەیە، لە سلێمانی زووتر دەستیان دەگات بە سەرچاوەی بەنزین لە ئێرانەوە، بۆیە هەرزانترە، بەڵام دابینکردنی بەشی زۆری بەنزینی هەولێر لە کۆمپانیاکانی کار و لانازە.

سەبارەت بە گرانبوونی نرخی بەنزین، جەنگی مەجید دەڵێت، ماوەی پێنج رۆژ بوو کۆمپانیای لاناز بەنزینی دابەش نەدەکرد، بەڵام ئەمڕۆ بڕێکی دابەشکردووە و بڕیارە لە رۆژانی ئایندە دۆخەکە ئاسایی بێتەوە.

سەبارەت بەو بڕیارەی وەزارەتی سامانە سروشتیەکان لە بارەی هەڵگرتنی قەدەخەی هاتنی بەنزین لەلایەن کۆمپانیاکانەوە، سەرۆکی ئەنجومەنی بەنزیخانە ئەهلییەکان دەڵێت، لە رۆژی شەممەوە بەنزینی بازرگانی دەگات و بەنزین هەرزانتر دەبێت و دۆخەکە ئاسایی دەبێتەوە.

ئێوارەی ئەمڕۆ پێنجشەممە 27.7.2023، نرخی بەنزین بە هەر سێ جۆری نۆرمال، موحەسەن و سوپەر لە نێوان هەردوو پارێزگا جیاوازیان هەیە و بەمجۆرەیە:

نرخی لیترێک بەنزینی نۆرمال لە هەولێر هەزار و 100 دینارە، بەڵام لە سلێمانی 900 دینارە.
نرخی لیترێک بەنزینی سوپەر لە هەولێر هەزار و 450 دینارە، بەڵام لە سلێمانی هەزار و 250 دینارە.
نرخی لیترێک بەنزینی موحەسەن لە هەولێر هەزار و 300 دینارە، بەڵام لە سلێمانی هەزار و 75 دینارە.
نرخی لیتری غاز لە هەولێر 400 دینارە، بەڵام لە سلێمانی بۆ هەر لیترێک غاز 425 دینارە.
لیترێک گازوایل لە هەولێر 750 دینارە، بەڵام لە سلێمانی بۆ هەر لیترێک گازوایل 700 دینارە.