لە ئیدارەی راپەڕین بۆ یەکەمجار قسە لەسەر دروستکردنی هۆتێلێکی پێنج ئەستێرەیی دەکرێت

فەرهاد حەسەن

لە ئیدارەی راپەڕین بۆ یەکەمجار بانگەواز بۆ دروستکردنی هۆتێلێکی پێنج ئەستێرەیی دەکرێت و بۆ ئەم مەبەستەش گەشتوگوزار داوا لە وەبەرهێنەران دەکات بەدەم بانگەوازەکەیانەوە بێن بۆ جێبەجێکردنی.

بەڕێوەبەرایەتی گشتی گەشتوگوزاری راپەڕین بە هەماهەنگی بەڕێوەبەرایەتی گشتی وەبەرهێنان، سەرۆکایەتی شارەوانی رانیە و ئەنجومەنی شارەوانی و لایەنە پەیوەندیدارەکان، بۆ یەکەمجار سێ پارچە زەوی ستراتیژی لە ناو نەخشەی بنەڕەتی شاری رانیە دەخاتە بەردەستی وەبەرهێنەران بۆ جێبەجێکردنی پڕۆژە گەشتیارییە گەورەکان.

پڕۆژەکان لە کەرتی وەبەرهێنان دەبن و بریتیین لە ، هۆتێلی پێنج ئەستێرەیی بە ستانداردی نێودەوڵەتی، هۆتێلی چوار ئەستێرەیی لەگەڵ شاری یاریی ئاوی (Aquapark) ، مۆتێل و رێستۆرانتی سێ ئەستێرەیی گەشتیاری.

بۆ جێبەجێکردنی ئەم پڕۆژانەی سەرەوە، گەشتوگوزار بەڵێن بە وەبەرهێنەران دەدات، کە  کارئاسانی تەواو لە هەموو پرۆسە ئیداری و یاساییەکانیان بۆ دەکات.  هەماهەنگی راستەوخۆ لەگەڵ هەموو لایەنە پەیوەندیدارەکان، پشتگیری تەواو لە هەموو قۆناغەکانی جێبەجێکردنی پڕۆژە و دابینکردنی ژینگەیەکی شەفاف و ئارام و دڵنیا بۆ سەرمایەگوزاریان بۆ دابین دەکات.

هەموو کۆمپانیا و وەبەرهێنەرانی ناوخۆیی و بیانی ئاگادار کراونەتەوە کە ئارەزووی وەبەرهێنانیان لە بواری گەشتوگوزاردا هەیە، داواکاری و پڕۆپۆزەڵی خۆیان لە ماوەی دوو هەفتە پێشکەش بە بەڕێوەبەرایەتی گشتی گەشتوگوزاری راپەڕین بکەن، بۆ هەڵسەنگاندن و دەستپێکردنی رێکارە یاساییەکان.