زبڵ و پیسی لە گوندەکانی سەر بە ناحیەی بنگرد لە ئیدارەی راپەڕین
"پاشماوەی گەشتیاران زیانی بە سروشتی ناوچەکە گەیاندووە"
سەرۆکی شارەوانی قەرەداغ داوا لە گەشتیاران دەکات ژینگەی سەیرانگاکان بپارێزن
964+
ژێوار خدر
سەرۆکی شارەوانی قەرەداغ داوا لە گەشتیاران دەکات بەرپرسیارانە مامەڵە لەگەڵ ژینگەی ناوچەکەدا بکەن، دلیڤا عەبدوڵا جەخت دەکاتەوە کە نابێت رێگە بدرێت سروشتی رەنگینی قەرەداغ بەهۆی پاشماوەی خۆڵ و خاشاکەوە بشێوێت و پێویستە هەمووان هاوکار بن لە پاکڕاگرتنی سەیرانگاکاندا.
بەپێی زانیارییەکانی بەڕێوەبەرایەتی گشتی شارەوانییەکانی سلێمانی، دلیڤا عەبدوڵا سەرۆکی شارەوانی قەرەداغ رایگەیاندووە، سەرەڕای ئەوەی هەموو ئامادەکارییەکان کراون و زبڵدان و تابلۆی هۆشیاری لە شوێنە گشتییەکان دانراون، بەڵام بەشێک لە گەشتیاران پابەندی رێنماییەکان نین، ئاماژەی بەوەش کردووە، فڕێدانی پاشماوەکان بووەتە دیاردەیەکی بەرچاو و زیانی بە جوانیی ناوچەکە گەیاندووە.
دلیڤا عەبدوڵا رووی دەمی دەکاتە گەشتیاران و دەڵێت: “تکایە بە فڕێدانی پاشماوەکان، ئەرکی ژینگەپارێزان سەختتر مەکەن کە بەردەوام لە خزمەتکردنی ناوچەکەدان.”
داواش دەکات هەموو کەسێک رۆڵی هەبێت لە پاراستنی ژینگە و بەو شێوەیە مامەڵە بکەن کە خزمەت بە سەقامگیریی سروشتی قەرەداغ بکات.
