لە رۆژانی تاقیکردنەوەی خولی دووەمی پۆلی 12 هێڵەکانی ئینتەرنێت رادەگیرێن

شۆڕش قادری

لە رۆژانی ئەنجامدانی تاقیکردنەوەی خولی دووەمی پۆلی 12ـی ئامادەیی هێڵەکانی ئینتەرنێت رادەگیرێن کە لە سبەی شەممەوە دەستپێدەکەن.

وەزارەتی گواستنەوە و گەیاندنی حکومەتی هەرێمی کوردستان لە راگەیەنراوێکدا بڵاویکردەوە، لەلایەن وەزارەتی پەروەردەوە و بە نووسراو داوایان لێکراوە، لە رۆژانی تاقیکردنەوەکان ئینتەرنێت رابگرن لەبەر بەرژەوەندی گشتی و رێگری کردن لە دیاردەی گزی کردن (غش) لە تاقیکردنەوەکانی خولی دووەم کە بەیانی رۆژی شەممە 23.8.2025 دەستپێدەکات و بە شێوەی رۆژێک نا رۆژێک تا رۆژی 8.9.2025 بەردەوام دەبێت.

ئاماژە بەوەشکراوە، تەنیا لە رۆژانی تاقیکردنەوەکان هێڵەکانی ئینتەرنێت و هەموو جۆرە نامەیەکی (MMS) رادەگیرێت، لە کاتژمێر (6:30) خولەکی بەیانی تاوەکو کاتژمێر (7:45) خولەکی بەیانی.

هەربەپێی راگەیەنراوەکە، ئەو شوێنانەشی دیاریکراون کە پێویستە لە هەموو حاڵەتێکدا ئینتەرنێتیان هەبێت، بە هەمان میکانیزمی پێشوو بێت و ئینتەرنێتیان بەردەوام دەبێت.