حەوت ساڵ زیندان بۆ پەرلەمانتارێکی تەقەدوم

ئەحمەد مستەفا

دۆسییەکی گەندەڵی کۆتاییەکەی بە حوکمی زیندان کۆتایی هات، دادگای تاوانەکانی بەرەنگاربوونەوەی گەندەڵی ناوەندی، محەمەد فەرمان شاهیر سەلمان جبوری، پەرلەمانتاری حزبی تەقەدوم، بە 7 ساڵ زیندان سزادا.

بەپێی راگەیاندنی دەستەی دەستپاکی عێراق، دادگا ئەو پەرلەمانتارەی بە تاوانی دەستکەوتی ناڕەوا تاوانبار کردووە و بڕیاری دا بڕی پارە و سامانە دەستکەوتووەکەی بگەڕێنێتەوە.

بەهای ئەو دەستکەوتە ناڕەوایە، بە 11 ملیار و 795 ملیۆن و 949 هەزار و 238 دینار، لەگەڵ 1 ملیۆن و 729 هەزار و 300 دۆلار، دیاریکراوە.

لەگەڵ سزای زیندان، دادگا سزای دارایی هاوتای دەستکەوتە ناڕەواکەی بەسەردا سەپاندووە، کە کۆی گشتییەکەی دەگاتە 28 ملیار و 157 ملیۆن و 250 هەزار و 476 دینار.

لە دۆسییەیەکی تردا، سێ ساڵ زیندانی توندی بەهۆی تاوانی شاردنەوە بەسەردا سەپێنراوە و بڕیاری دەستبەسەرداگرتنی سامانە نەختینە و نانەختینەکانی پشتڕاست کراوەتەوە.