ئۆتۆمبێلێک بەنمایشکردن نەخۆشانی نەخۆشخانەیەکی هەولێری هەراسان کرد

شۆڕش قادری

رۆژانە دەبینین هەندێک کەس بە نمایشکردن و سوڕاندنەوەی ئۆتۆمبێلەکانیان لەسەر کوچە و شەقامەکان خەڵکی بێزار دەکەن، شۆفێرێک بەوەش رازی نەبووە، چووەتە بەردەم نەخۆشخانەی رۆژئاوای هەولێر و نەخۆشەکانی هەراسان کردووە، پۆلیسی هاتوچۆش دەستوبردی لێکرد و دەستی بەسەرداگرت.

هێمن حەمەئەمین وتەبێژی هاتوچۆی هەولێر گرتەڤیدیۆی نمایشکردنی ئەو ئۆتۆمبێلەی بۆ 964 نارد و وتی، “بەرەبەیانی ئەمڕۆ دووشەممە 2.6.2025 ئەو ئۆتۆمبێلە چووەتە بەردەم نەخۆشخانەی فریاکەوتنی رۆژئاوا و بەنمایشکردن نەخۆشەکانی هەراسان کردووە”.

ئاماژەی بەوەشکرد، لەرێی کامێراکانی چاودێرییەوە ئۆتۆمبێلەکەیان دۆزیوەتەوە و دەستیان بەسەرداگرتووە.

هێمن حەمەئەمین وتیشی، هەر کەس و لایەنێک بەوشێوەیە لەسەر کوچە و شەقامەکان هاوڵاتیان ئیزعاج بکات، لێپێچینەوەی لەگەڵ دەکرێت و رووبەڕووی یاسای دەکەنەوە.