ئەمساڵ زیاتر لە 70 شوێنی دەرمانفرۆشتن سزادراون
“خەڵك دەرمانی ساختە بۆ دابەزاندنی كێش و هێزی سێكسی بەكاردەهێنن”
+964
شۆڕش هەرکی – هەولێر
بەرپرسی چاودێریی بازاڕ و بازگەکانی دەرمان لە هەرێمی کوردستان دەڵێت، خەڵك لە ئۆنلاین دەرمانی دابەزاندن یان زیادكردنی كێش و هێزی سێكسی دەكڕن، ئەمەش ترسناكە و حاڵەتی مردنیشی لێكەوتووەتەوە.
بەڕێوەبەرایەتیی کۆالێتی کۆنتڕۆڵی جۆریی دەرمان هەوڵەکانیان چڕکردووەتەوە بۆ نەهێشتنی دەرمانی ساختە و ماوەبەسەرچوو.
گۆڤەند رەوەند، بەرپرسی چاودێریی بازاڕ و بازگەکانی دەرمان لە هەرێمی کوردستان بە 964ی وت، ئەمساڵ سەردانی زیاتر لە 400 شوێنیان کردووە و ژمارەیەک لەوانە پێبژاردنیان بۆکراوە و ژمارەکیش داخراون، كە زیاتر لە 70 شوێن بوون، تەنانەت ژمارەیەک لەوانە دراونەتە دادگا.
وتیشی، بەشی زۆری ئەو دەرمانانە بۆ بابەتەکانی جوانکاری و سێکسی و خۆلاوازکردنەوە بەکاردێن، کە ساختەن و دوورن لەرێنمایی پزیشکی.
گۆڤەند رەوەند دەڵێت، بوونی ستیكەر لەسەر دەرمان یەكلاكەرەوە بۆ ئەوەی بزانیت دەرمانەكە ساختەیە یان ئۆرجیناڵ و رێگەپێدراوە.
پێداچوونەوە: ئەرسەلان عەبدوڵا
