گرافیک ؛ 964+
" كلینیكه‌كانتان له شوێنی ده‌وامتان بێت"
وه‌زاره‌تى ته‌ندروستى پزیشكانى قه‌زا و ناحیه‌كان ئاگادار ده‌كاته‌وه
964+
فه‌رهاد حه‌سه‌ن
وه‌زاره‌تى ته‌ندروستى ئه‌و پزیشكانه ئاگادارده‌كاته‌وه كه خاوه‌ن كلینیكی تایبه‌ت به خۆیانن و پێیان ده‌ڵێت، پێویسته كلینیكه‌كانتان له شوێنى ده‌وامى فه‌رمى خۆتان بێت.
به‌پێی نووسراوێكی وه‌زاره‌تى ته‌ندروستى، بڕیاره‌كه ته‌واوى ئه‌و پزیشكانه ده‌گرێته‌وه كه ده‌وامى فه‌رمیان له قه‌زاو ناحیه‌كانى هه‌رێمى كوردستانه و بڕیاره‌كه‌ش گشتێندراوه بۆ سه‌رجه‌م به‌ڕێوه‌به‌رایه‌تییه گشتییه‌كان له پارێزگاو ئیداره سه‌ربه‌خۆكان.
له نووسراوه‌كه‌دا جه‌خت له‌سه‌ر دوو نووسراوى پێشووى ده‌كاته‌وه كه به‌ژماره (8304) له 28.5.2021 و ژماره (9216) له 11.6.2012 تایبه‌ت به‌و پزیشكانه كه “پێویسته كلینیكى تایبه‌ت به خۆیان هه‌یه دواى ده‌وامى فه‌رمیان له سنوورى ئه‌و قه‌زا و ناحییانه بێ كه به‌یانیان ده‌وامى فه‌رمی تیاده‌كه‌ن”.
بەڕێوەبەرایەتی گشتی تەندروستی راپەڕین، وێنه‌یه‌كى ئه‌م نووسراوه‌ى وه‌زاره‌تى بڵاوكردووه‌ته‌وه كه له 12.5.2024 ده‌رچووه، ئاماژه‌ى به‌وه‌كردووه “هه‌ر پزیشكێك پابه‌ند نه‌بێت بەرپرسیاردەبێت”.
