یارییەکی پێشووی نێوان دۆرتموند و پاریس لە 2023. فۆتۆ: X
چامپیۆنزلیگ
ئه‌مشه‌و “یاریگه زه‌رده‌که” گڕ ده‌گرێت
964+
ئه‌رسه‌لان عه‌بدوڵا
له یاریی چوونی پێش كۆتایی چامپیۆنزلیگی ئه‌وروپا، ئه‌مشه‌و یانه‌ی بۆروسیا دۆرتموندی ئه‌ڵمانی له یاریگه‌ی خۆیدا رووبه‌ڕووی یانه‌ی پاریس سانجێرمانی فه‌ره‌نسی ده‌بێته‌وه.
یارییه‌كه كاتژمێر 10:00 به كاتی هه‌ولێر له یاریگه‌ی سیگنال ئیدونا پارك ده‌كرێت، كه جێگه‌ی زیاتر له 88 هه‌زار هانده‌ری تێدا ده‌بێته‌وه.
هاندەرانی دۆرتموند یەکێک لە سەرنجڕاکێشترین شێوازی هاندانیان هەیە و فشارێکی زۆر گەورە لەسەر تیپی میوان دروست دەکەن.
ئه‌مشه‌و چاوه‌ڕوان ده‌كرێت یاریگه‌ی دۆرتموند زه‌ردێكی ته‌واو بپۆشێت و ئاو له چاوی پاریسییه‌كان بهێنن.
دۆرتموند له یاریگه‌ی خۆیدا تیپێكی زۆر سه‌خته و راهێنه‌ری یانه‌كه‌ش ئیدین تیرزیچ رایگه‌یاند، متمانه‌ی به تیپه‌كه‌ی هه‌یه بردنه‌وه تۆمار بكات.
هه‌روه‌ها وتی، ئه‌مڕۆ بۆ بردنه‌وه یاریی ده‌كه‌ین و راسته ئه‌زموونی ئێمه كه‌متره، به‌ڵام هه‌موو هۆكارێكی بردنه‌وه‌مان هه‌یه.
شێره‌كانی فێستیڤاڵن، كه نازناوی دۆرتمونده، ئه‌مشه‌و به پاڵپشتیی هانده‌ره سه‌رنجڕاكێشه‌كانیان، رووبه‌ڕووی ئێمباپێ و هاوڕێیه‌كانی ده‌بنه‌وه.
لویس ئێنریكێی راهێنه‌ری پاریس سانجێرمان پێش یاریی ئه‌مڕۆ وتی، “جگه له بردنه‌وه، هه‌ر ئه‌نجامێكی دیكه بۆ ئێمه سوودی نییه و بێهیواییه، ئێمه‌ش هیچ جیاوازییه‌كمان له‌گه‌ڵ تیپه‌كانی دیكه‌ی ئه‌م قۆناغه نییه”.
وه‌رزی رابردوو هه‌ردوو یانه له كۆمه‌ڵه‌ی شه‌شه‌می چامپیۆنزلیگ به‌یه‌كه‌وه بوون، له یاریی یه‌كه‌مدا پاریس 2-1 بردنه‌وه‌ی تۆمار كرد، یاریی دووه‌م له ئه‌ڵمانیا كرا و به 1-1 گۆڵ یه‌كسان بوون.
ئاماره‌كانی نێوانیان
هه‌ردوو یانه پێشتر 6 یارییان به‌یه‌كه‌وه كردووه، 2 بردنه‌وه بۆ پاریس و 1 بردنه‌وه بۆ دۆرتموند، له 3 یارییشدا یه‌كسان بوون.
دۆرتموند 4 گۆڵی له پاریس كردووه، به‌ڵام پاریس 7 گۆڵی كردووه.
گه‌وره‌ترین ئه‌نجام بۆ دۆرتموند 2-1 بووه، گه‌وره‌ترین بردنه‌وه‌ش بۆ پاریس 2-0 بووه.
