فەرماندەیەکی سەربازی: داعش هێرشی کردووە و کوژراو هەیە

964+

توانا نەقی

لە سنووری ناحیەی قەراجی سەر بە مەخموور، چەكدارانی داعش هێرشیان كردووەتە سەر هێزەكانی سوپای عێراق و بەپێی زانیارییەكان کوژراو هەیە.

هێرشەکە لە سنووری گوندی گۆڵتەپە لە ناحیەی قەراجی قەزای مەخمور روویداوە.

غازی فەیسەڵ فەرماندەی هێزی پێشمەرگەی خۆبەخشی چیای قەرەچوغ بە 964ـی وت، هێرشەکە ئەم بەیانییە بووە و تا ئێستا سەربازێک کوژراوە نازادرێت چەند کەس بریندارە.

وتیشی، هێزێکی زۆری ئەوان و سوپای عێراق لە شوێنەکەن و تەنانەت فرۆکەی جەنگیش بە ئاسمانی شوێنەکەوەیە و خێزانێکی کوردی گەمارۆدراویان رزگار کردووە.

ئەو فەرماندەیە ئاماژەی بەوەکرد، چەکدارەکانی داعش ئێستا لە دوو خانوودان و بەرگری دەکەن بەڵام بەو پێیەی هێزێکی زۆر لەوێیە شەڕەکە کۆنترۆڵدەکرێت.

كاتژمێر 11:15 دەقیقەی شەوی رابردووش چەكدارانی داعش لە سنووری دوو گوندی ئەم ناحیەیە هێرشیان ئەنجامداوە.

لە هێرشەکەی دوێنێ شەدا دوو سەربازی عێراقی بریندار بوون.