بۆ کەمکردنەوەى قەرەباڵغى؛ شەقامێکى 30 مەترى لە سلێمانى دروست دەکرێت

دیلان محەمەد- سلێمانى

دروستکردنى شەقامێکى نوێ لە شارى سلێمانى، بەشێک لە لۆد و قەرەباڵغى سەر شەقامەکان کەمدەکاتەوە و دەبێتە هۆى بەیەکەوە بەستنى گەڕەکەکانى راپەڕین و قولەرەیسى بە سەرچنار و چەقچەق.

شەقامەکە جوتسایدێکى 30 مەترییە و لە دوو قۆناغ پێکدێت، قۆناغى یەکەمى ئەمڕۆ بە درێژایى یەک کیلۆمەتر قیرکردنى بۆ دەکرێت و تەواو دەکرێت، قۆناغى دووەمى دەکەوێتە مانگەکانى داهاتوو کە دوا قۆناغە.

گرنگى شەقامەکە لەوەدایە، هەردوو گەڕەکى راپەڕین و قولەرەیسى بە سەرچنار و چەقچەق دەبەستێتەوە و دەبێتە هۆى کەمبوونەوەى لۆد و قەرەباڵغى. بەتایبەت کە لە سنوورى راپەڕین و قولەرەیسى چەندین پڕۆژەى نیشتەجێبوونى گەورە هەن.

محەمەد سەلام، وتەبێژى کۆمپانیاى شارى دایک کە لایەنى جێبەجێکارى پڕۆژەکەن، بۆ 964 قسەى کردوو دەڵێت: شەقامەکە بەناوى چەقامى بابانە و جگە لە خزمەتە گشتییەکەى لە داهاتوودا دەبێت بە شەقامێکى بازرگانى، چونکە چەندین دووکان و رێستۆرانت و ناوەندى بازرگانى لەسەر دروست دەکرێن.

پێدچوونەوە: وریا فەتاح