پڕکردنەوەی یەکێک لە چاڵەکانی رێگای سەرەکی وارماوە. فۆتۆ: قایمقامیەتی دەربەندیخان
79 ملیۆن دینار بۆ چاککردنی رێگای سەرەکی وارماوە دابینکرا
964+
هاوبەش ئەبوبەکر
وەزارەتی دارایی رەزامەندی دا لەسەر خەرجکردنی بڕی 79 ملیۆن دینار بۆ چاککردنی رێگای سەرەکی وارماوە، لە نزیک گوندی میرەدێ تا تونێلی دەربەندیخان.
ئەمڕۆ چوارشەممە 30.8.2023، سلێمان محەمەد، قایمقامی دەربەندیخان بە 964ـی راگەیاند، چاککردنی رێگاکە بە دوو قۆناغ جێبەجێ دەکرێت و بۆ هەردوو قۆناغەکە نزیکەی 160 ملیۆن دیناری پێویستە.
درێژیی رێگاکە نزیکەی 18 کیلۆمەترە و لە قۆناغی یەکەمدا بە 79 ملیۆن و 258 هەزار دینار بەشێک لە چاڵ و چۆڵییەکانی چاک دەکرێن.
“بڕیارە قۆناغی یەکەم بە نزیکەی هەفتەیەک تەواو بکرێت، بۆ قۆناغی دووەمیش داوای نزیکەی 81 ملیۆن دینارمان کردووە و هێشتا رەزامەندی نەدراوە”، قایمقامی دەربەندیخان وای وت.