ئهمساڵ “نههات” رووى له پایتهختى هەنجیرى عێراق كردووه
964+
فهرهاد حهسهن
یهكێك لهو ناوچانهى كه رێژهى 40%ـى ههنجیرى عێراق دابین دهكات، بههۆى وشكهساڵیییهوه بهرهو لهناوچوون دهچێت.
له عێراق، دیالە به پایتەختی پرتەقاڵ و پارێزگاى بابلیش به پایتەختی هەنجیر ناسراون.
ناوچەی بەنی موسلیمی سەر بە شارۆچكەی كفل لە پارێزگای بابل یەكێكە لەو ناوچانەی، كە خاوەن زۆرترین بەرهەمی هەنجیرە لە عێراقدا.
سالم عەبدوڵا خەفاجی، سەرۆكی یەكێتی كۆمەڵەی جوتیاران لە پارێزگای بابل بە میدیا ناوخۆییەكانی عێراقی راگەیاند، بەهۆی كەمی ئاوەوە ژمارەیەكی زۆر باخی هەنجیر لە ناوچەی بەنی موسلیمی سەر بە پارێزگای بابل و ژمارەیەك ناوچەی تر زیانیان بەركەوتووە.
خاكی ئەو ناوچانە و ئەزموونی خەڵكەكەی و نزیكییان لە رووباری فوراتەوە وایكردووە خەڵكی ناوچەكە بە شێوەیەكی فراوان دار هەنجیر بڕوێنن، كە هەندێك لەو دارانە تەمەنیان زیاتر لە 40 ساڵە، ئەمەش پێویستی بە رێژەیەكی گونجاوی ئاو هەیە.
دەشڵێت “گەر ئەو دارانە وشك ببەنەوە قەرەبووكردنەوەیان ئەستەمە”.
به پێویستیشی دهزانێت، حكومەت بڕی بەردانەوەی ئاو بۆ ناوچەكە زیاد بكات، بە لەبەرچاوگرتنی ئەوەی پارێزگای بابل باشترین بەرهەمی هەنجیری هەیە و لە وەرزی بەرهەمهێناندا بە هەزاران تۆن دەخرێتە بازاڕەكانەوە.
باسم مسلاماوی، جوتیارێكی پارێزگای بابلە و دەڵێت، بەهۆی نەبوونی ئاوەوە ناچار بیریان لێداوە بۆ ئاودانی باخەكانیان، بەڵام جیاوازییەكی گەورە لە نێوان ئاوی بیرەكە و ئاوی رووباری فورات هەیە.
ئهو جوتیاره دهشڵێت “ئاوی بیر رێژەیەكی زۆری سوێری تێدایە و پێویستی بە پاڵاوتنە تا بتوانرێت سوودی لێ وەربگیرێت، بەڵام ئاوی رووباری فورات ئاوێكی شیرینی گونجاوە”.
بەهۆی دروستكردنی دەیان بەنداو لەسەر رووباری دیجلە و فورات لەلایەن دەوڵەتی توركیاوه، عێراق دووچاری وشكەساڵیی و كەمئاوییەكی سەخت بووەتەوە و كاریگەرییەكانی تەنگی بە هاوڵاتییانی عێراق هەڵچنیوە.