بە عارەبانەیەک قیر سێ کیلۆمەتر چاڵ و چۆڵی رێگەی گوندەکەیان پڕکردەوە

ئەحمەد مستەفا – سلێمانی

گەنجانی گوندی بێستانسوور بەدرێژایی سێ کیلۆمەتر، بە قیر چاڵوچۆڵی رێگەی گوندەکەیان پڕکردەوە.

گوندی بێستانسوور دەکەوێتە ناحیەی عەربەت و ژمارەیان زیاتر لە 250 ماڵە، سەرچاوەی ئاوی لێیە و شوێنێکی گەشتیاریشە.

گەنجەکان زیاتر لە پێنج کەس دەبوون، پیاوێکی ریش سپی گوندەکەیان هاوکاری کردوون و کارگەیەکی قیر عارەبانەیەک قیری شلی پێداون تا بە خاکەناز چاڵ و چۆڵی رێگەکە پڕبکەنەوە.

ئەوان لە کاتژمێر 7:00ی بەیانی بۆ 12:00ی نیوەرۆ و بە پێنج کاتژمێر چاڵوچۆڵی ئەو رێگەیان نەهێشت.

ئەمرۆ پێنجشەممە 13.7.2023، حەمە شارەزووری کە سەرپەرشتی گروپەکە دەکات دەربارەی کارەکەیان بە 964ی وت، “وەک کارێکی چاکە و لە پێناو هاتوچۆی خەڵک و شۆفێران و هەستکردنمان بە بەرپرسیارێتی لە ئاستی ئەو کەموکوڕییە خزمەتگوزارییانەی لە گوندەکەمان هەیە، کارەکەمان ئەنجامداوە”.

ئەو گەنجە دەڵێت، “دانیشتوانی گوندەکەمان بە بەردەوامی بۆ کڕینی پێداویستی رۆژانە لە ناحیەکانی زەڕایەن و عەربەت و هەروەها پارێزگای سلێمانی هاتوچۆ دەکەن، هەروەها هاوین و بەهاران خەڵکی چواردەوروبەری گوندەکە بۆ مەلەکردن سەردانی گوندەکە دەکەن”.

پێداچوونەوە: فەهمی نەبی