لە جەژنیشدا جوتیارانی کەرکوک مانگرتنیان نەشکاندووە

964+

پێشەوا محەمەد

ماوەی مانگێکە جوتیارانی کورد لە شاری کەرکوک مانگرتنیان راگەیاندووە و جەژنی قوربانیش مانگرتنیان نەشکاند.

ناڕەزایەتی ئەو جوتیارانە دوای بڕیارێکی حکومەتی عێراقی هات، کە زیاتر لە 130 هەزار دۆنم زەوی دەستی بەسەردا گیراوە و ناهێڵن جوتیاران نزیکی ئەو زەویانە ببنەوە.

جگە لە جوتیارانی کورد بەشێک لە جوتیارانی تورکمانیش لە مانگرتنەکەدا بەشدارن، کە زەوی ئەوانیشی بەرکەوتووە.

کێشەیەکی دیکەی ئەو جوتیارانە ئەوەیە عەرەبی هاوردە هاتووەتە سەر زەوییەکانیان و نووسراوی دادگایان پێیە و داوای قەرەبووی ئەو چەند ساڵە دەکەن، کە زەوییەکان لە لایەن ئەو جوتیارانەوە بەکارهێنراون.

فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێم بە 964ی راگەیاند، بە تەواوی پشتگیری ئەو جوتیارانە دەکەن، چونکە لەسەر حەقن و لەسەر زەوی باوک و باپیرانیانن.

وتیشی، “وەک حکومەتی هەرێم پاڵپشتی تەواویان دەکەین و هاوکاریان دەکەین”.