کەرکوک.. ناوەندێکى شیاندنەوەى بۆ ئاڵوودەبووانى مادەى هۆشبەر کرایەوە

هاوبەش ئەبوبەکر

بەڕێوەبەرایەتی کاروبارى مادە هۆشبەرەکانى عێراق، سێ ناوەندى شیاندنەوەى ئاڵوودەبووانى مادەى هۆشبەرى کردەوە کە یەکێکیان لە پارێزگاى کەرکوکە.

حکومەتی عێراق دەیەوێت بەم ناوەندانە بەشێک لە بازرگانانی مادەى هۆشبەر و ئاڵودەبووان لێک جیابکاتەوە.

کردنەوەی ئەو سێ ناوەندە هاوکات بوو لەگەڵ یادى رۆژى جیهانى بەرەنگاربوونەوەى مادەى هۆشبەر.

وەزارەتى ناوخۆى عێراق دەڵێت، ناوەندەکان لە پارێزگاکانى کەرکوک، ئەنبار و نەجەفن.

“ئامانج لە کردنەوەى ئەو ناوەندانە، جیاکردنەوەى بەکارهێنەران و ئاڵوودەبووانى مادەى هۆشبەرە لە بازرگانان و قاچاخچییەکانی ئەو جۆرە مادەیە و بەمەبەستى شیاندنەوەیان”. وەزارەتى ناوخۆى عێراق وا دەڵێت.

بەپێی ئاماری بەڕێوەبەرایەتی گشتیی نەهێشتنی مادە هۆشبەرەکان، تەنیا لە ماوەی سێ مانگی کۆتایی ساڵی 2022ـدا لە هەرێمی کوردستان، 481 بەکارهێنەر و بازرگانی مادەی هۆشبەر دەستگیرکراون و دەستیش بەسەر 381 کیلۆ ماددەی هۆشبەردا گیراوە.