پێشانگای کتێب لە زانکۆی دهۆک
زانکۆی دهۆک خوێندکارەکانی بۆ خوێندنەوە هان دەدات
+964
زەید کۆچەر – دهۆک
ڤیدیۆ
کتێبخانەی نوورسین بە هاوکاریی بەشی زمانی زانکۆی دهۆک پێشناگایەکی کتێب دەکاتەوە، خوێندکارانیش خۆشحاڵیی خۆیان بە پێشانگاکە و داشکاندنی نرخی کتێبەکان دەردەبڕن.
پێشانگاکە لەناو زانکۆی دهۆک کراوەتەوە و ماوەی پێنج رۆژ بەردەوام دەبێت.
وەک هەیسەم عەبدولواحید، خوێندکاری زانکۆی دهۆک بە +964ـی وت، ئەو پێشانگایە هاندانێکی باشە بۆ خوێندکاران بۆ دەستکەوتنی سەرچاوەی زانستی. “هیوادارین ئەو جۆرە پێشانگایانە ساڵانە چەند جارێک لە زانکۆ بکرێتەوە.”
لە پێشانگاکەدا بە هەریەکە لە زمانەکانی کوردی، عەرەبی و ئینگلیزی کتێب بەردەست خراوە.
محەمەد بەرواری، بەڕێوەبەری پێشانگاکە و خاوەنی کتێبخانەی نوورسین بە +964ـی راگەیاند: مەبەستی سەرەکیی ئێمە نزیککردنەوەی خوێندکار و کتێبە و لێرەش خوێندکاران پێشوازییەکی زۆر باشیان لە پێشانگاکە کردووە.
“هەم سەرچاوەی زۆری زانستیمان بۆ خوێندکاران هێناوە، هەم ٢٥٪ بۆ ٤٠٪ داشکانمان کردووە”، محەمەد بەرواری وای وت.