“تێپەڕینی چوار ساڵ خەمی خێزانەکەمی کەم نەکردووەتەوە”

ئەحمەد مستەفا

لە چوارەمین ساڵیادی ژینا ئەمینی، ئەمجەد ئەمینی باوکی، پەیامێکی سوپاسگوزاری ئاڕاستەی خەڵک کردووە کە بە شێوەی جۆراوجۆر یاد و ناوی کچەکەی و شۆڕشی “ژن، ژیان، ئازادی” یان زیندوو راگرتووە.

ئەمجەد ئەمینی دەڵێ، تێپەڕینی چوار ساڵ نەیتوانیوە خەمی لەدەستدانی ژینا لە دڵی خێزانەکەی کەم بکاتەوە، بەڵام هاوسۆزی و پشتیوانیی خەڵک وای کردووە لەم خەمەدا خۆیان بە تەنیا نەبینن.

ئەو هەروەها ئاماژەی بە داخستنی دووکان و بازاڕ لە هەندێک شار کرد و ئەمەی بە نیشانەیەک لە یەکگرتوویی و هاودەردیی خەڵک لەگەڵ خێزانەکەی ژینا باس کردووە.

باوکی ژینا هەروەها وتی، سەرەڕای رێگریکردن لە خێزانەکەی بۆ سەردانی مەزاری کچەکەی لە ئارامگەی ئایچی، خەڵکی کوردستان بە شێوەی جۆراوجۆر یاد و ناوی ژینایان بەرز راگرتووە.

ئەو لە کۆتاییدا سوپاسی ئەو کەسانەی کردووە، کە لە ناوخۆ و دەرەوەی ئێران بە پەیام، گوڵ و یادکردنەوە هاوسۆزییان دەربڕیوە.