لە راپەڕین کوڵەفڕە خواستی زۆری لەسەرە

964+
ژێوار خدر

ماوەیەکە لە هەرێمی کوردستان باڵندەی هەوێردە (کوڵەفڕە) بەخێودەکرێت و بەخێوکەرانی ئەو باڵندەیەش دەڵێن گۆشت و هێلکەکەی لە رووی تەندروستییەوە سودی زۆرە و هەر ئەوەش وایکردووە خواستێکی زۆری لەسەر بێت لەلایەن هاوڵاتیانەوە.

هەوێردە باڵندەیەکی بچوکە و کێشەکەی دەگاتە 250 بۆ 350 گرام، لە تەمەنی 42 رۆژیدا دەست دەکات بە هێلکەکردن.

بە قسەی شارەزایان، ئەو باڵندەیە بۆ ماوەی شەش ساڵ دەژیت و لە کۆی تەمەنیشیدا دەتوانێت بۆ ماوەی سێ ساڵ هێلکە بکات.

لە کۆی 365 رۆژی ساڵدا لە توانایدایە نزیکەی 300 هێلکە بکات.

ئەو باڵندەیە بە پلەی یەکەم لە وڵاتانی ئەفریقا و ئەسیوپیا بەخێودەکرێت و ماوەیەکە لە هەرێمی کوردستانیش گرنگی پێدەدرێت.