لە راپەڕین هەوکردنی پەردەی مێشکی منداڵ تۆمارکراوە

ژێوار خدر

پەتای هەوکردنی مێشک گەیشتە سنوری راپەڕین و نەخۆشخانەیەک تایبەت دەکرێت بەو منداڵانەی تووشی نەخۆشییەکە بوون.

لە ئێستادا 22 منداڵ لە سنوری ئیدارەی راپەڕین تووشی پەتای هەوکردنی پەردەی مێشک بوون و لەژێر چاودێریدان.

تەها محەمەد بەڕێوەبەری راگەیاندنی تەندروستی راپەڕین بە 964ـی وت، “ئەو 22 منداڵەی تووشی پەتای هەوکردنی مێشک بوون، 12یان دانیشتوی قەزای پشدەرن و 10یان لە رانیەن”.

هەوکردنی پەردەی مێشک حاڵەتێکە تیایدا ئەو پەردەیەی دەوری مێشک و دڕکەپەتک دەدات تووشی هەوکردن دەبێت جا بە ڤایرۆس بێت یان بەکتریا.

وتیشی، نەخۆشخانەی ژیان لە رانیە تایبەتکراوە بە توشبووانی پەتاکە و لەوێ چارەسەر وەردەگرن، روونیشیکردەوە “ئامادەکاری تەواو”یان کردووە بۆ چارەسەر و رێگریکردن لە زیاتر بڵاوبوونەوەی نەخۆشییەکە.

بەگوێرەی زانیارییەکانی 964، تاوەکو ئێستا سەدان منداڵ وەکو توشبووی هەوکردنی پەردەی مێشک لە ناوچە جیاجیاکانی هەرێمی کوردستان تۆمارکراون.