لە سەرەتای ئەم هەفتەیەوە دەرهێنانی پاسپۆرت لە سلێمانی دەوەستێت
964+
دیلان محەمەد جەزا – سلێمانی
بڕیارە رۆژی دووشەممە تیمێکی بەڕێوەبەرایەتی گشتی پاسپۆرتی عێراق بگەنە شاری سلێمانی، هەر لەورۆژەشەوە کارەکانی دەرهێنانی پاسپۆرت لە سلێمانی دەوەستێت بۆ ماوەی یەک مانگ.
مەبەست لە هاتنی ئەو تیمە راهێنانی کارمەندانی بەڕێوەبەرایەتی پاسپۆرتی سلێمانیە، لەبارەی دەرهێنانی پاسپۆرتی ئەلیکترۆنییەوە.
پاسپۆرتی ئەلیکترۆنی نرخی دەبێتە 100 هەزار دینار، بەڵام ئەو پاسپۆرتەی ئێستا بە هاوڵاتیانە نرخەکەی 25 هەزار دینارە.
عەمید سالار عەبدوڵا، بەڕێوەبەری پاسپۆرتی سلێمانی بە 964ی راگەیاند، لەگەڵ کارکردن بە پاسپۆرتی ئەلیکترۆنی رێنمایی نوێ دەردەچێت لەبارەی پاسپۆرتە کۆنەکانەوە.
ھەموو جیھان لە ئێستادا پاسپۆرتەکانیان دەگۆڕن بۆ ئەلیکترۆنی، ھەڵگری ئەو جۆرە پاسپۆرتە ناچێتە بەردەم کارمەندی فڕۆکەخانە، بە ئامێرێکدا تێدەپەڕێت و پاسپۆرتەکەی لێدەدات و دەڕوات.
پێداچوونەوە: توانا نەقی