هەولێری نوێ دەبێتە خاوەن دوو شەقامی 30 مەتری

توانا نەقی

ئەمڕۆ بەردی بناغەی پرۆژەی دروستکردنی دوو شەقامی 30 مەتری لە هەولێر دانرا.

پرۆژەی شەقامەکان لە گەڕەکی هەولێری نوێیە و بە گوژمەی 270 ملیۆن دینار لەسەر بودجەی پارێزگای هەولێر و 15%ی داهاتی سەرۆکایەتی شارەوانی هەولێر دروستدەکرێت.

ئومێد خۆشناو، پارێزگاری هەولێر لە کاتی دانانی بەردی بناغەی شەقامەکان رایگەیاند، ئەم پرۆژەیە سودێکی زۆر بە دانیشتوانی گەڕەکی هەولێری نوێ دەگەیەنێت و هیوادارین جێگەی رەزامەندییان بێت.

وتیشی، لەو گەڕەکە و لە بەشێکی دیکەی گەڕەکەکانی هەولێر پرۆژەی خزمەتگوزاری تێدا ئەنجامدەدرێت، زۆربەیان لەسەر بودجەی پارێزگای هەولێر و شارەوانی هەولێر دەبێت.

دانانی بەردی بناغەی ئەو پرۆژەیە پێکاهاتووە لە دروستکردنی شەقامێکی 30 مەتری لە گەڕەکی هەولێری نوێ نزیک قوتابخانەی هەولێری نوێ، هەروەها دروستکردن و قیرتاوکردنی شەقامێکی تری 30 مەتری لە نزیک حیزبی زەحمەت کێشان لە گەڕەکی هەولێری نوێ.