شارەوانی هەولێر: پێنج هەزار نەمامی نوێ لە دەوری شەقامەکان دەچێنین

+964

كوردستان ئەحمەد – هەولێر

لە هەولێر كاری رێكخستنەوە و جوانكاری بۆ شەقامەكانی ناو شار دەکرێت و پێنج هەزار نەمامی نوێ دەچێندرێت، بە قسەی شارەوانی.

سەرۆكایەتی شارەوانی هەولێر راگەیەنراوێكی بڵاوكردوەتەوە و دەڵێت، هەڵمەتێكیان بۆ رێكخستنەوە و جوانكردنی سروشتی شەقامەكانی ناو شار دەستپێكردووە بۆ ئەوەی دار و باخچەكان بە شێوازێكی مۆدێرن و جوان رێكبخەنەوە.

نەمامەكان رێكدەخرێنەوە، دارە كۆن و شكاوەكان دەبڕدرێن و لە جێگەیان نەمامی دیكە دەچێنرێن  كە وا بڕیارە پێنج نەمامی نوێ لە شەقام و شوێنە گشتییەكان دابنرێن و بە دیزاینێكی نوێ.

هەڵمەتەكە سەرەتا لە شەقامی ٦٠ مەترییەوە دەستپێدەكات و دواتر دەگاتە شەقامی ١٠٠ مەتری و شوێنە گشتیەكان و بۆ ماوەی ١٥ رۆژ بەردەوام دەبێت.

بەپێی ئاماری شارەوانی هەولێر، لە ئێستادا ملیۆنێك و ٥٠٠ هەزار دار هەن لە ناوەند و دەوروبەری شەقامەکانی شارەکە.