جومعە باوبۆرانە و بەتەمای سەیران مەبن

شۆڕش قادری

رۆژی پێنجشەممە باوبۆران روو لە کوردستان دەکات و هەموو ناوچەکان دەگرێتەوە، بۆیە ئەم هەینییە بەتەمای چوونەدەرەوە و سەیران مەبن.

وەک کەشناسی کوردستان پێشبینی کردووە، لە کاتەکانی بەیانی رۆژی پێنجشەممە 29.10.2026 ناوچەکان دەکەوێتە ژێر کاریگەری  نزمە پاڵەپەستۆی دەریای ناوەڕاست و بارانبارین دەستپێدەکات.

بارانەکە هەموو ناوچەکانی کوردستان دەگرێتەوە و هەورەتریشقەشی لەگەڵ دەبێت، تا رۆژی شەممە 31ـی ئەم مانگە بەردەوام دەبێت.

لە هەندێک شوێن بارانی بەخوڕ دەبێت و کەشناسی کوردستان رێژەی بارانبارینی ناوچەکانی لەو چەند رۆژەدا بەم شێوەیەی خوارەوە پێشبینی کردووە؛

سەنتەری پارێزگاکان لە سەرووی 12 ملم دەبێت.

سەنتەری ئیدارە سەربەخۆکانی (راپەڕین، زاخۆ و سۆران)  سەرووی 15 ملم دەبێت.

سەنتەری ئیدارەی گەرمیان لە سەرووی 8 ملم دەبێت.

ناوچە شاخاوییە بەرزەکان و سنوورییەکان سەرووی 20 ملم دەبێت.

ئاماژە بەوەشکراوە، هەندێک کات ئەگەری بەرزبوونەوەی ئاستی ئاو هەیە لەکاتی باران بارینی بەلێزمە، لەگەڵ ئەوەشدا پلەی گەرما سێ بۆ پێنج پلە نزم دەبێتەوە و خێرایی باـش لە رۆژی هەینیدا زیاد دەکات بۆ سەروو 25 کم لە کاتژمێرێکدا .