بۆ قەڵاچۆکردنی مێش و مەگەزە
ئیدارەی سۆران دەستی بە رشاندنی کۆڵان و گەڕەک و زبڵخانەکان کرد
فەرهاد حەسەن
لە ئیدارەی سۆران بەرێوەبەرایەتی خۆپاراستنی تەندروستی هەڵمەتێکی رشاندنی کۆڵان و گەڕەک و زبلخانەکانەکانی دەستیپێکرد بۆ قەڵاچۆکردنی ئەو مێش و مەگەز و مێشوولانەی لەو شوێنانە بلاوبوونەتەوە.
هەڵمەتەکە، لەژێر چاودێری بەرێوەبەرایەتی گشتی تەندروستی سۆران بەڕێوەدەچێت، بەمەبەستی پاراستنی تەندروستی هاونیشتیمانیان، کە ئەو مێش و مەگەزانە هۆکارێکی سەرەکین بۆ گواستنەوەی چەندین نەخۆشیی گوازراوە.
تیمەکانی هۆبەی نەخۆشییە گوازراوەکان هەڵمەتەکەیان بە فراوانی بۆ رشاندنی زبڵخانەکان و گەڕەک، کۆڵان و شوێنە گشتییەکانی ئیدارەکە دەستپێکردووە.
مەبەستێکی دیکەی هەڵمەتەکە بریتییە لە بەرەنگاربوونەوەی نەخۆشییە گوازراوەکان لەناو کۆمەڵگەدا و دابینکردنی ژینگەیەکی تەندروست و پاراستنی سەلامەتی هاوڵاتیان بەهاوکاری و هەماهەنگی لایەنە پەیوەندیدارەکان.
داوا لە هاوڵاتیان کراوە، بەرەچاکردنی ئەم رێنماییانەی خوارەوە، هاوکاری تیمەکان بکەن بۆ سەرکەوتنی ئەم هەڵمەتە و بەدەستهێنانی باشترین ئەنجام:
– پاشماوە و خۆڵ و خاشاک لە شوێنی تایبەتدا دابنێن و سەری کیسەی خۆڵەکان بە توندی دابخەن.
– رێگری بکەن لە کۆبوونەوەی ئاوی مەیو لە نزیک ماڵەکانتان، چونکە دەبێتە هۆی زاوزێی مێشوولە.
– لەکاتی تێپەڕبوونی تیمەکانی رشاندن، هاوکاریان بن و رێگەیان بۆ ئاسان بکەن.