داوا لە حکومەتی عێراق کرا رسوماتی گومرگی لەسەر هەندێک کاڵا هەڵبگرێت

ئەحمەد مستەفا

داوا لە حکومەتی عێراق کرا، رسوماتی گومرگی لەسەر هەندێک کاڵا هەڵبگرێت، ئەوەش بە ئامانجی ئاسانکاری بۆ بازرگانان و دابینکردنی پێداویستییەکانی بازاڕ بە نرخێکی گونجاو، لە کاتێکدا گۆڕانکاریی نرخی دۆلار کاریگەری لەسەر بازاڕ و بژێوی هاوڵاتییان دروست دەکات.

ئەمڕۆ دووشەممە، وەزارەتی بازرگانی و پیشەسازیی هەرێمی کوردستان لەگەڵ نوێنەرانی بازرگانان کۆبووەوە و دۆخی بازاڕ، ئاسانکاریی گومرگی و رێگاکانی کەمکردنەوەی فشارە ئابوورییەکان لەسەر هاوڵاتییان تاوتوێ کرد.

لە کۆبوونەوەکەدا، رەسووڵ حاجی عومەر، سەرۆکی لقی هەولێری هاوردە و ناردنکاران، جەختی لەسەر پێویستیی لەبەرچاوگرتنی دۆخی ئابووریی هاووڵاتییان لە دیاریکردنی نرخەکان کردەوە.

وەک یەکێتی هاوردە و ناردنکاران ئەمڕۆ دووشەممە 12.10.2026 باسی کردووە، داوا لە بازرگانان کراوە لە بەرزکردنەوەی نادروستی نرخەکان خۆیان بپارێزن، هەروەها، نوێنەرانی بازرگانان گرفتەکانی خۆیان خستەڕوو بۆ دۆزینەوەی چارەسەری گونجاو.